Кардыналы выбралі
новага Папу. Сведчаннем гэтаму стаў белы дым, які ўзняўся з коміну на даху Сікстынскай
капэлы ў 19.05. Пантыфік быў абраны на другі дзень галасавання, што з’яўляецца вельмі
рэдкай гістарычнай падзеяй. Імя новага Наступніка св. Пятра стане вядома праз некаторы
час. Яго абвесціць кардынал-протадыякан, які на працягу бліжэйшай гадзіны павінен
з’явіцца на цэнтральнай лоджыі ватыканскай базылікі. Парадкам правядзення выбараў
Пантыфіка прадугледжана, што пасля таго, як адзін з кандыдатаў набярэ неабходную колькасць
галасоў, ён павінен будзе выказаць сваю згоду з выбарам пурпуратаў і назваць імя,
якое хоча насіць як Папа. Пасля гэтага выбарчыя карткі спальваюцца ў печцы, устаноўленай
у Сікстынскай капэле. У гэты час новаабраны Папа накіроўваецца ў “пакой слёз”, каб
пераапрануцца і памаліцца. Затым ён вяртаецца ў Сікстынскую капэлу, дзе кожны з пурпуратаў
абяцае яму павагу і паслухмянасць. Пасля гэтага Пантыфік накіроўваецца на цэнтральную
лоджыю ватыканскай базылікі, адкуль удзяляе вернікам сваё першае благаслаўленне “Urbi
et Orbi”. Па дарозе ён спыняецца для малітвы ў капліцы св. Паўла. У гэты час кардынал-протадыякан
абвяшчае яго імя народу.