Папа Францішак да святароў: будзьце пастырамі, а не службовымі асобамі
Папа Францішак заклікаў
святароў не быць проста адміністрацыйнымі работнікамі Касцёла. “Будзьце пастырамі,
а не службовымі асобамі”, - сказаў Святы Айцец 21 красавіка ў ватыканскай базыліцы
падчас святарскіх пасвячэнняў дзесяці навучэнцаў рымскіх семінарый. Францішак упершыню
ўдзяліў гэты сакрамэнт у якасці Пантыфіка. Святары павінны разумець сябе як “пасярэднікаў”,
а не “сераднякоў”, сказаў Папа. Яны – прапаведнікі Евангелля і пастыры Божага народу,
падкрэсліў ён. Святы Айцец заклікаў да пакоры і сціпласці. Святары павінны заўсёды
прытрымлівацца прыкладу Добрага Пастыра”, які прыйшоў не каб Яму служылі, але каб
служыць іншым і ратаваць гінучых, нагадаў ён.
У сваёй гаміліі папа Францішак
запрасіў будучых святароў да асаблівага клопату аб слабых і старых. “Не саромцеся
з пяшчотай адносіцца да старых людзей!”, - сказаў ён. “Не стамляйцеся быць міласэрнымі!”,
- звярнуўся да кандыдатаў да святарства Пантыфік, гаворачы аб іх абавязку ўдзядяць
сакрамэнт хворых. Папа перасцярог іх ад прыватнай інтэрпрэтацыі хрысціянскага паслання.
Паводле Пантрыфіка, яны заўсёды павінны ўсведамляць, што справа не ў тым, каб падабацца
сабе, але каб быць даспадобы Богу. Божае Слова – не ваша ўласнасць, яно належыць Богу,
нагадаў Францішак падчас сваёй гаміліі. Спрыяйце ўзрастанню хрысціянскага паслання
ў Касцёле, заклікаў ён будучых святароў.
Найважнейшай задачай вучня Хрыста
з’яўляецца ўважлівае чытанне Святога Пісання і разважанне над яго словам, каб умацоўваць
сваю веру, нагадаў Папа. Сэнс Біблійнага паслання ў тым, каб яго прыняць і жыць у
адпаведнасці з ім, дадаў ён. Яшчэ адным заданнем святароў, якое яны павінны ажыццяўляць
разам са сваімі біскупамі, з’яўляецца аб’яднанне вернікаў у “адной сям’і”, нагадаў
Папа.
Новыя святары навучаліся ў Вышэйшай папскай рымскай духоўнай семінарыі,
Дыяцэзіяльным місійным калегіўме “Redemptoris Mater” і Семінарыі Маці Божай Любові.
Яны паходзяць з Італіі, Аргентыны, Індыі і Харватыі. Найстарэйшы ў гэтай групе 44-гадовы
Джузэпэ Канфорці, а малодшы 26-гадовы Сіджо Куцікаціль. Адзін з неапрэсбітэраў мае
адукацыю спецыяліста па палітычных навуках, а другі працаваў у вядомай міжнароднай
кампаніі па вытворчасці прадметаў раскошы.