Святы Айцец: сапраўдная малітва вядзе да найбольш патрабуючых
Сапраўдная малітва
дазваляе выйсці за ўласныя рамкі, адкрывае на Бога і найбольш патрабуючых, лічыць
папа Францішак. 11 мая, падчас Эўхарыстыі ў капліцы Дома св. Марты, Пантыфік разважаў
аб хрысціянскай малітве. Каментуючы евангельскія словы: “калі чаго ў імя Маё папросіце
ў Айца, дасць вам”, Папа адзначыў, што ў іх утрымліваецца канкрэтнае пасланне: “Айцец
дасць нам усё, але заўжды ў імя Езуса”, - сказаў ён. Пантыфік прызнаўся, што яго заўсёды
захапляў вобраз уваскрослага Хрыста. “Езус заклікае нас мець давер да сваёй мукі,
давяраць Яго перамозе над смерцю, давяраць Яго ранам. Ён святар і Яго раны – гэта
ахвяра. Гэта нас напаўняе даверам і мужнасцю для малітвы”, - сказаў Святы Айцец. Паводле
Пантыфіка, сапраўднай малітвай з’яўляецца зыход з самаго сябе да Айца ў імя Езуса.
Навучыцца такому “зыходу” можна толькі праз набліжэнне да ранаў асоб найбольш патрабуючых.
“Калі
мы не выходзім за ўласныя рамкі да найбольш патрабуючых братоў: да хворых, бедных,
да тых, каго эксплуатуюць, калі мы не здольныя выйсці да іх ранаў, ніколі не навучымся
свабодзе, якая вядзе да зыходу з саміх сябе ў накірунку ранаў Езуса. Існуюць два спосабы
зыходу з саміх сябе: адзін – да ранаў Езуса, іншы – да ранаў нашых братоў і сясцёр.
І гэта накірунак, якога Езус чакае ад нашай малітвы”, - адзначыў Папа.
Святы
Айцец заклікаў знаходзіць раны Хрыста на нашых бліжніх, якія “яшчэ нясуць крыж і да
гэтага часу не перамаглі, як перамог Езус”.