Папе прадстаўлены апошнія статыстычныя дадзеныя Касцёла
За мінулы год колькасць
католікаў на свеце павялічылася. На сённяшні дзень іх налічваецца 1214 млн. чалавек,
што на 1,5 % больш у параўнанні з 2011 г. Гэта вынікае з сёлетняга выдання “Annuario
Pontificio” – даведніка, у якім утрымліваецца падрабязная статыстычная інфармацыя
пра Касцёл. 13 мая яго прадставілі папе Францішку. Паводле зборніка, католікі складаюць
17,5% ад усяго насельніцтва планеты. Найбольш інтэнсіўна іх колькасць расце ў Афрыцы
(яна вырасла на 4,3% у параўнанні з 2011 г.) і ў Азіі (на 2%). У Еўропе і Амерыцы
гэтыя паказчыкі ніжэйшыя – тут колькасць католікаў павялічылася толькі на 0,3%. Назіраецца
таксама павелічэнне колькасці біскупаў. Ва ўсім свеце іх налічваецца 5132. Гэта на
0,55% больш, чым ў 2010 г. Асабліва заўважна іх колькасць узрасла ў Акіяніі (на 4,6%)
і Афрыцы (на 1 %). Аднак, да гэтага часу 70% біскупаў паходзяць з Еўропы і Амерыкі.
Колькасць
святароў і законнікаў на працягу апошніх 10 гадоў павялічылася на 2,1%, сёння іх налічваецца
413 418 чалавек. Аднак, гэта дынаміка не з’яўляецца аднолькавай для ўсіх кантынентаў.
Рост колькасці святароў адбываецца ў асноўным за кошт новых пакліканняў ў Афрыцы (больш
на 39,5%) і Азіі (на 32%). У Еўропе за апошнія 10 гадоў святароў стала менш на 9%.
Цікава,
што за гэты самы перыяд амаль на 40% павялічылася ў свеце колькасць сталых дыяканаў.
Пазітыўная дынаміка тычыцца ў першую чаргу еўрапейскага кантыненту, дзе іх стала больш
на 43% . 97,4% усіх сталых дыяканаў у свеце прыходзіцца на Еўропу і Амерыку.
Колькасць
законных братоў павялічылася ў Афрыцы (на 18,5%) і Азіі (на 44%), але значна паменшылася
ў Еўропе (на 18%), Амерыцы (на 3,6%) і Акіяніі (на 21,9%).
Таксама за апошнія
10 гадоў у свеце амаль на 10% паменшылася колькасць законніц.
Што тычыцца новых
кандыдатаў да святарства, то іх, у параўнанні з 2001 г., стала больш на 7,5 % і сёння
налічваецца 120616 чалавек. Рост колькасці семінарыстаў у асноўным адбываецца за кошт
Афрыкі (тут іх стала больш на 30,9%) і Азіі (на 29,4).
Новы “Annuario Pontificio”
прадставілі Святому Айцу кардынал Дзяржсакратар Тарчызіо Бэртонэ і субстытут Апостальскай
Сталіцы, арцыбіскуп Анджэла Бэчу. Даведнік распрацавала Цэнтральная статыстычная служба
Святога Пасаду.