Папа ўнёс змены ў ватыканскае крымінальнае заканадаўства
11 ліпеня 2013 г.
Святы Айцец зацвердзіў папраўкі ў Крымінальны і Крымінальна-працэсуальны кодэксы і
Агульныя нормы па адміністрацыйных санкцыях для Дзяржавы Ватыкана і Святога Пасаду.
Адпаведны дакумент, падпісаны папам Францішкам, выданы ў форме “Motu Proprio”. Новыя
крымінальныя законы з’яўляюцца працягам намаганняў па абнаўленні прававой сістэмы
Дзяржавы Ватыкан, і грунтуюцца на мерах, прынятых пасля 2010 г. падчас пантыфікату
Бэнэдыкта XVI, гаворыцца ў заяве Залы Друку. Яны ўключаюць у ватыканскую прававую
сістэму палажэнні шматлікіх міжнародных канвенцый, у тым ліку: чатырох Жэнеўскіх канвенцый
1949 г. супраць ваенных злачынстваў, Канвенцыі 1965 г. аб ліквідацыі ўсіх форм расавай
дыскрымінацыі; Канвенцыі 1984 г. супраць катаванняў і іншых жорсткіх, бесчалавечных
ці прыніжаючых годнасць відаў абыходжання і пакарання; Канвенцыі 1989 г. аб правах
дзіцяці і яе Факультатыўных пратаколаў 2000 года.
У ватыканскае заканадаўства
ўводзяцца такія паняцці як: гандаль дзецьмі, дзіцячая прастытуцыя, вярбоўка дзяцей,
сексуальнае насілле і палавыя акты з дзецьмі, вытворчасць і захоўванне дзіцячай парнаграфіі,
а таксама: злачынствы супраць чалавечнасці, злачынствы генацыду і апартэіду. Новыя
законы накіраваны таксама супраць злачынстваў, учыненых пры ажыццяўленні дзяржаўнага
кіравання, і ўпісваюцца ў Канвенцыю ААН 2003 г. супраць карупцыі.
Адгэтуль
скасоўваецца такая форма пакарання, як пажыццёвае зняволенне, якое замяняецца на максімальнае
пакаранне ад 30 да 35 гадоў пазбаўлення волі. Уводзіцца паняцце канфіскацыі і замарожвання
актываў.
У адпаведнасці з самымі апошнімі падзеямі на міжнародным узроўні,
адзін з трох новых законаў уводзіць сістэму штрафаў для юрыдычных асоб, якія атрымліваюць
прыбытак ад злачыннай дзейнасці ўваходзячых у іх структуры органаў або персаналу.
Закон
аб адміністрацыйных санкцыях носіць агульны характар, каб служыць у якасці агульнай
асновы, якая прадугледжвае магчымасць прымянення санкцый у розных галінах, накіраваных
на забеспячэнне павагі да норм, іх эфектыўнасці і абароны грамадскіх інтарэсаў.
У
цэлым, гэтыя нарматыўныя намаганні з’яўляюцца часткай больш шырокага працэсу, накіраванага
на далейшую мадэрнізацыю ватыканскай прававой сістэмы з мэтай павышэння яе паслядоўнасці
і эфектыўнасці, гаворыцца ў спецыяльным паведемленні Залы Друку.