Трохгадовая дзяўчынка
напісала папе Францішку ліст – і той на яго адказаў. Алічэ Марыя Рокка з Озіа Сопра
ў паўночна-італьянскай правінцыі Бергама ў маі прыняла ўдзел у св. Імшы з нагоды 50-годдзя
з дня смерці Яна XXIII. Францішак пацалаваў яе і благаславіў, калі праходзіў паміж
натоўпу вернікаў. Гэта ўразіла дзяўчынку, і Алічэ Марыя напісала з дапамогай бабулі
ліст да Святога Айца, у якім папрасіла благаслаўлення для сябе, сваёй сям’і і дзіцячага
садка. Цяпер яна атрымала адказ ад Папы з благаслаўленнем, паведаміла 13 ліпеня “Corriere
della Sera”.
Гэта не першы прыклад, які сведчыць аб тым, што Святы Айцец з
увагай ставіцца да карэспандэнцыі, якая надыходзіць на яго адрас. Так, у маі папа
Францішак выслаў ліст да маладых вязняў у Каліфорніі, у якім паабяцаў маліцца за іх.
Фота Святога Айца, на якіх ён абмыў ногі жыхарам калоніі для непаўналетніх у Рыме
ў Вялікі чацвер, узрушылі вязняў у Лос-Анджэлесе, і яны скіравалі ліст Пантыфіку,
падзякаваўшы яму за гэты ўчынак і просячы аб малітве. У адказ Папа выслаў ліст, дзе
папрасіў езуіцкую асацыяцыю, якая апякуецца маладымі вязнямі, перадаць ім, што ён
памятае пра іх у малітве.