Святы Айцец праводзіць
сённяшні дзень у Кастэль Гандольфа. Яго прабыванне ў летняй рэзідэнцыі Рымскіх Пантыфікаў
14 ліпеня 2013 г. распачалося сустрэчай з мясцовымі супрацоўнікамі і прадстаўнікамі
свецкай улады. Пасля паўгадзіннага пералёту з Ватыкану ў 9.30 на падворку Апостальскага
палацу Пантыфіка прывіталі мясцовы біскуп Марчэла Сэмерара, дырэктар Папскіх віл Саверыа
Петрыла і мэр Кастэль Гандольфа Мільвія Манакэзі. Францішак прызнаўся, што прыбыў,
каб сустрэцца з грамадзянамі горада, пілігрымамі і турыстамі. Але не толькі, Папа
хацеў таксама падзякаваць супрацоўнікам Папскіх віл іх сем’ям за іх каштоўнае служэнне
Святому Пасаду. Пантыфік скарыстаўся магчымасцю і перадаў праз біскупа Сэмерара прывітанне
ўсёй супольнасці Кастэль Гандольфа і манаскім супольнасцям, якія жывуць на яго тэрыторыі.
Святы Айцец заклікаў вернікаў дыяцэзіі Альбана з радасцю і энтузіязмам абвяшчаць і
сведчыць Евангелле.
Францішак не заставіў без увагі і мясцовыя ўлады ў асобе
мэра Кастэль Гандольфа Мільвіі Манакэзі. Ён падзякаваў палітычнаму кіраўніцтву за
шчырае супрацоўніцтва з Касцёлам і папрасіў перадаць сваё сардэчнае прывітанне і абяцанне
малітоўнай памяці ўсяму насельніцтву. Папа заклікаў мясцовых жыхароў жыць у надзеі
і спакоі і заўсёды быць уважлівымі да людзей, якія адчуваюць нястачу. “Адчыніце дзверы
надзеі, каб яна распаўсюджвалася, і нясіце спакой, заўсёды!”, - заклікаў Святы Айцец.
Папа
прызнаўся, што ў гэтым месцы яго “думкі звяртаюцца да бл. Яна Паўла II і Бэнэдыкта
XVI, якія любілі праводзіць частку лета ў папскай рэзідэнцыі”. Іх сведчанне, сказаў
Францішак, з’яўляюцца пастаянным заахвочваннем да паўсядзённай вернасці Хрысту і жыцця
ў адпаведнасці з патрабаваннямі Евангелля і вучэння Касцёла.
Папа даверыў супрацоўнікаў
Папскіх віл і жыхароў Кастэль Гандольфа мацярынскаму заступніцтву Найсвяцейшай Панны
Марыі і папрасіў аб малітве за яго.