Папа Францішак у Рыа: моладзь – гэта зрэнка нашага вока
Пачалося першае Апостальскае
падарожжа Папы па-за межы Італіі. 22 ліпеня самалёт са Святым Айцом на борце прызямліўся
каля 16-й гадзіны паводле мясцовага часу ў міжнародным лётнішчы Рыа-дэ-Жанейра. Пантыфік
непасрэдна з самалёту, у суправаджэнні сустрэўшых яго кіраўніка і членаў ураду, арцыбіскупа
Рыа і прэзідэнта епіскапату краіны накіраваўся ў катэдру, а потым адправіўся ў прэзідэнцкі
палац, дзе на адкрытай пляцоўцы адбылася цырымонія прывітання.
У сваёй прамове
Францішак падкрэсліў шчыльныя вузы, якія спалучаюць Бразілію з Апостальскай Сталіцай
і з наступнікам св.Пятра. “Я ведаю, што, каб быць прынятым бразільскім народам, неабходна
прайсці праз браму яго вялікага сэрца”, - сказаў Папа.“Як у апостала, ў мяне няма
ані золата, ані срэбра, але прыношу вам больш каштоўнае: Езуса Хрыста”,- працягваў
Пантыфік. Францішак адзначыў, што прыбыў на кантынент “ў Яго імя”. Ён патлумачыў,
што мэта падарожжа - “ажывіць полымя братэрскай любові, якое гарыць ў кожным сэрцы”.
“Жадаю, каб вы прынялі маё прывітанне: Мір Хрыста няхай будзе з вамі”,- звярнуўся
Папа да ўсіх, хто яго прыйшоў вітаць. Затым Святы Айцец падкрэсліў, што прыбыў у Бразілію,
каб сустрэцца з маладымі людзьмі з усяго свету. “ Іх чакала тут з распасцёртымі
абдымкамі статуя Хрыста Збаўцы, якая лунае над горадам”, - сказаў Францішак.
Адносна
удзельнікаў СДМ, Папа паведаміў прысутным на цырымоніі: “Яны прыбылі з розных кантынентаў,
гавораць на розных мовах, прадстаўляюць розныя культуры, аднак у Хрысце знаходзяць
адказы на свае найбольш узнёслыя імкненні, якія іх яднаюць; могуць у Ім заспакоіць
голад чыстай праўды і сапраўднай любові. Вось што іх аб’ядноўвае па-над усялякай разнароднасцю.”,
- падкрсэліў Святы Айцец і дадаў, што гэта магутная энергія вызваляецца, калі маладыя
людзі давяраюць Хрысту.
Папа прызнаўся у сваёй свядомасці таго, што, калі звяртаецца
да моладзі, то праз іх таксама звяртаецца да іх бацькоў, іх касцельных супольнасцей
і ўсяго грамадства, у якім яны жывуць: да людзей, ад якіх залежыць будучыня новых
пакаленняў. “Маладыя людзі з’яўляюцца зрэнкаю нашага вока. Яны, як тое вакно, праз
якое святло ўваходзіць у нас, праз якое прыходзіць у свет будучыня, што ставіць перад
намі новыя шматлікія выклікі”, - адзначыў Святы Айцец. Пантыфік нагадаў, што
старэйшае пакаленне будзе на вышыні абяцання перад маладымі людзьмі, калі здолее запэўніць
ім прастору; калі здолее даць моцны фундамент, на якім можна далей будаваць жыццё;
калі здолее гарантаваць бяспеку і адукацыю, каб кожны малады чалавек мог станавіцца
тым, кім хоча быць; калі перадасць яму трывалыя каштоўнасці, дзеля якіх варта жыць.
На канец папа Францішак сцвердзіў, што сваім візітам хоча ахапіць увесь
бразільскі народ, з яго складаным чалавечым, культурным і рэлігійным багаццем: ад
Амазоніі да пампы, ад засушлівых рэгіёнаў поўдня да Пантаналу (вялікай раўніны на
поўначы Бразіліі); ад малых вёсак да вялізных метраполій. Потым Папа пагутарыў
з прэзідэнтам краіны і коратка сустрэўся з губернатарам штату Рыа –дэ-Жанейра і мэрам
горада з сем’ямі.
Пасля пералёту і сустрэчы Францішак накіраваўся ў рэзідэнцыю
арцыбіскупа Сумарэ, дзе будзе маліцца і адпачываць да серады, 24 ліпеня.