25 ліпеня 2013 г.,
пасля цырымоніі благаслаўлення флагаў Алімпійскіх і Паралімпійскі гульняў і ўручэння
Папе сімвалічных ключоў ад Рыа-дэ-Жанейра, якая прайшла ў Гарадскім палацы, Францішак
какіраваўся ў фавэлы Варжынія – на геаграфічную, маральную і эканамічную перыферыю
Рыа. Пантыфік прызнаўся, што прыезд сюды быў яго асабістым жаданнем і рашэннем, і
калі б у яго была такая магчымасць, ён “хацеў бы пастукацца ў кожныя дзверы, сказаць
“добрай раніцы”, папрасіць кубак халоднай вады, (...) паслухаць сэрца кожнага”. Францішак
звярнуў увагу на патрэбу гасціннасці, бо прымаючы “велікадушна кагосьці і дзелячыся
з ім чымсці (...) мы не толькі не становімся бяднешымі, але ўзбагачаемся”. “Рэальнае
багацце заключаецца не ў рэчах, але ў сэрцы!”, - падкрэсліў Папа. Бразільцы, на думку
Святога Айца, могуць даць свету ўрок салідарнасці, таго, аб чым сёння так часта забываюцца
або ігнаруюць.
Пантыфік звярнуўся да тых, хто мае больш рэсурсаў і запрасіў
іх “нястомна працаваць для свету больш справядлівага і больш салідарнага”. На думку
Папы, “ніхто не можа заставацца абыякавым да няроўнасці, якая ўсё яшчэ існуе ў свеце”.
Францішак запрасіў да барацьбы з “культурай эгаізму і індывідуалізму”, якая часта
пераважае ў грамадствах, і імкнення да “культуры салідарнасці”. Трэба глядзець на
іншага чалавека як на брата, а не канкурэнта або лічбу, нагадаў Пантыфік. Не будзе
гармоніі і шчасця ў грамадстве, якое ігнаруе, выдаляе на перыферыі частку самаго сябе,
дадаў ён, маючы на ўвазе бедных.
Апрача беднасці матэрыяльнай і голаду хлеба,
існуе больш глыбокі голад – шчасця, які можа задаволіць толькі Бог, заўважыў Папа.
Таму грамадству патрэбны нематэрыяльныя даброты: жыццё, сям’я, інтэгральная адукацыя,
клопат аб здароўі і бяспека, дадаў ён. Пантыфік папрасіў маладых людзей – жыхароў
фавэл – не расчароўвацца ў не заўсёды справядівай рэальнасці і стаць першымі, хто
будзе несці дабро і адмаўляцца ад зла.
Па выніках перапісу насельніцтва з 2010
г., 11% са 195 млн. жыхароў Бразіліі жыве ў больш за 6 млн. фавэл. Многія з іх – гэта
маладыя людзі.