“Паставіць Хрыста
ў цэнтр уласнага жыцця”, - заклікаў папа Францішак удзельнікаў Эўхарыстыі, якую ўзначаліў
у рымскім галоўным езуіцкім касцёле Найсвяцейшага Імя Езуса, больш вядомага як “Іль-Джэзу”.
Святы Айцец наведаў гэту святыню 31 жніўня, ва ўспамін св. Ігнацыя Лаёлы, заснавальніка
Ордэна езуітаў, да якога ён сам належыць. Літургія з Пантыфікам насіла прыватны характар.
У ёй прынялі ўдзел каля 80-ці законнікаў на чале з генеральным настаяцелем Ордэна
езуітаў, кс. Афольфа Нікаласам, супрацоўнікі езуіцкіх структур і прадстаўніцы жаночых
манаскіх кангрэгацый, натхнёных ігнацыянскай духоўнасцю. Перад уваходам у касцёл Святога
Айца віталі тысячы вернікаў. Візіт Францішка ў рымскую езуіцкую супольнасць працягваўся
каля 2-х гадзін. У сваёй гаміліі падчас св. Імшы Папа звярнуў увагу на тры аспекты:
неабходнасць паставіць у цэнтр свайго жыцця Хрыста і Касцёл, служэнне, і адчуванне
сораму за уласныя слабасці і грахі. Францішак нагадаў, што езуіты не павінны ісці
ізаляваным ад усяго Касцёла шляхам. “Служыць Хрысту – значыць любіць гэты Касцёл,
і служыць яму са шчырасцю і ў духу паслухмянасці”, - сказаў ён.
Святы Айцец
адзначыў, што неабходна быць адкрытым на дзейнасць Бога: дазволіць Пану авалодаць
сабой, каб лепш служыць бліжнім. Паводле Францішка, трэба саромецца ўласных слабасцяў
і грахоў, бо пакора дазваляе ўбачыць, што “не мы будуем Валадарства Божае, але гэта
ласка Пана заўсёды дзейнічае ў нас”.
Пантыфік узгадаў пра кс. Паўла Даль Ольё,
які некалькі дзён таму быў выкрадзены ў Сірыі. Святы Айцец звярнуў увагу таксама на
прыклад двух езуітаў, якія аддалі жыццё, служачы Евангеллю – св. Францішка Ксаверыя
і айца Пэдра Арупэ. На заканчэнне Эўхарыстыі ён узначаліў працэсію да алтара з рэліквіямі
св. Ігнацыя Лаёлы, якія захоўваюцца ў касцёле. Тут Папа запаліў зніч.
Некалькі
дзён таму, размаўляючы з журналістамі па дарозе з Рыа-дэ-Жанейра ў Рым, Францішак
адзначыў, што мае ў сэрцы езуіцкую духоўнасць. “Я адчуваю сябе езуітам і думаю як
езуіт”, - сказаў Папа.