Святы Айцец звярнуўся
з відэа-пасланнем да сваіх суайчыннікаў, сабраных у санктуарыі св. Каетана, размешчанага
ў адным з перыферыйных раёнаў Буэнас-Айрэса. Папа Францішак спаслаўся на тэму сёлетняга
святкавання: “З Езусам і св. Каетанам ідзём на сустрэчу з найбольш патрабуючымі”,
і запрасіў вернікаў не забывацца пра асоб, якія маюць патрэбу ў дапамозе. Пантыфік
заклікаў “падаць ім руку”, “глядзець на іх з любоўю”, “падзяляць іх боль, трывогі
і праблемы”. “Але галоўнае, не глядзець на іх здалёк або дапамагаць ім здалёк”, -
заўважыў Святы Айцец і дадаў, што трэба сустракацца з такімі людзьмі, бо ў гэтым сэнс
паслання Хрыста – ісці на сустрэчу з тымі, якія жывуць у нястачы. Ён запрасіў “глядзець
у вочы” тым, каму даём міласціну.
“Езус вучыць нас перш за ўсё сустракацца,
і, сустракаючыся, дапамагаць”, - нагадаў Папа і запрасіў фарміраваць “культуру сустрэчы”,
асабліва ў кантэксце “сямейных бязладзіц”, “праблем у асяроддзі”, “непрыемнасцяў на
працы”. Паводле пераканання Папы, не трэба баяцца сустракацца з тымі, хто мае патрэбу
ў нас, “хто перажывае дрэнныя часы”, горшыя за нашы. “Заўсёды ёсць нехта, каму цяпер
горш!”, - падкрэсліў Пантыфік і дадаў, што менавіта з гэтым чалавекам хрысціянін павінен
сустрэцца. Ён запрасіў аргентынцаў шукаць тых, якія жывуць у нястачы, і не пакідаць
іх самотнымі. “Ідзі, каб дапамагчы ім, усё астатняе будзе зроблена Езусам, усё зробіць
Святы Дух”, - заклікаў аргентынскіх вернікаў Францішак і дадаў, што “сустрэча памнажае
здольнасць любіць”.
Св. Каетан з’яўляецца патронам Аргентыны. Штогод 7 жніўня,
ва ўспамін смерці святога, тысячы аргентынцаў сустракаюцца ў яго санктуарыі ў Буэнас-Айрэсе.
Галоўную св. Імшу ў гэты дзень на працягу кіравання архідыяцэзіяй узначальваў кардынал
Берголіа, сённяшні папа Францішак.