Папа Францішак падзякаваў
арцыбіскупу Апарэсіды і старшыні бразільскага епіскапата кардыналу Раймунду Дамасэну
Ассісу за гасціннасць і адкрытасць аказаныя яму падчас пілігрымкі ў санктуарыі Маці
Божай у Апарэсіде ў рамках Сусветных дзён моладзі. Святы Айцец наведаў гэта месца
24 ліпеня. Тут ён узначаліў Эўхарыстыю і меў магчымасць сустрэцца з мясцовымі біскупамі
і семінарыстамі. Пантыфік адзначыў, што захоўвае “глыбока ў памяці і сэрцы” успаміны
пра гэту падзею, а таксама вялікую колькасць людзей, якія “нягледзячы на холад і дождж”,
пажадалі суправаджаць яго ў гэтай пілігрымцы. “Без сумніваў, гэта была цудоўная магчымасць
перажыць успаміны аб маім прабыванні ў санктуарыі, падчас V Канферэнцыі епіскапата
Лацінскай Амерыкі і Карыбскага басейна”, - адзначыў Папа, успамінаючы пра падзею 2007
г. на якой ён прысутнічаў у якасці арцыбіскупа Буэнас-Айрэса.
Францішак даверыў
Маці Божай усіх жыхароў кантынента і папрасіў кардынала Ассіса перадаць падзяку ўсім
біскупам, святарам і прадстаўнікам касцёльных супольнасцяў, якія спрычыніліся да падрыхтоўцы
Сусветных дзён моладзі. Папа выразіў перакананасць, у тым, што гэта “свята веры прынясе
ласкі для Касцёла ў Бразіліі”, а пасеяныя зерні паспрыяўюць наступленню новай вясны
ў Касцёле ў гэтай краіне.