Францішак да бежанцаў: кожны з вас нясе ў сабе багацце
10 верасня папа Францішак
наведаў рымскі езуіцкі цэнтр дапамогі бежанцам і мігрантам “Astalli”. Святы Айцец
прыбыў у той час калі сотні людзей, стаялі каля ўваходу ў цэнтр, каб атрымаць пасілак.
Папа паразмаўляў з імі, а затым накіраваўся ў саму установу – ён прайшоў тым самым
шляхам, якім штодзённа праходзяць сотні людзей, вымушаных пакінуць родную зямлю ў
пошуку хлеба, міра і павагі да сваіх правоў. Па дарозе Святы Айцец сустрэўся з валанцёрамі
якія працуюць у цэнтры, супрацоўнікамі, якія аказваюць прававую дапамогу бежанцам
і мігрантам, урачамі і аптэкарамі. Францішак наведаў капліцу цэнтра “Astalli”. Тут
ён выслухаў сведчанні некаторых мігрантаў, а затым звярнуўся да сабраных з прамовай.
“Кожны з вас, дарагія сябры, нясе з сабой жыццёвую гісторыю, якая кажа пра драмы вайны,
канфлікты, часам звязаныя з міжнароднай палітыкай. Але кожны з вас перш за ўсё нясе
чалавечае і рэлігійнае багацце, якога не трэба баяцца, а якое трэба прыняць. Многія
з вас мусульмане, іншых рэлігій; вы паходзіце з розных краін, з розных сітуацый. Мы
не павінны баяцца адметнасцяў!”, - сказаў Папа.
Пантыфік нагадаў, што каб прыбыць
у Рым, многім давялося зрабіць цяжкае і небяспечнае падарожжа. “Я асабліва думаю пра
жанчын, пра маці, якія пераносяць усё гэта, каб забяспечыць сваім дзецям будучыню
і надзею на іншае жыццё для сябе і сваіх сем’яў. Рым павінен быць горадам, які дазволіць
вярнуць чалавечае вымярэнне, дазволіць зноў пачаць усміхацца”, - пажадаў Святы Айцец.
Францішак
выразіў падзяку ўсім, хто дапамагае мігрантам і бежанцам. “Пакажыце, што гасціннасцю
і братэрствам можна адкрыць вакно ў будучыню, больш чым вакно – браму”, - заклікаў
Папа.
Святы Айцец засяродзіўся на трох галоўных прынцыпах працы езуітаў і іх
паплечнікаў у дапамозе патрабуючым: служэнні, суправаджэнні і абароне. Ён падкрэсліў,
што слова “салідарнасць”, якое звязана са служэннем, наводзіць страх на самую развітую
частку свету. “Яго спрабуюць не прамаўляць. Для іх гэта амаль бруднае слова”, - сказаў
Папа. Ён заклікаў кожнага адказаць на пытанне: “ці я пахіляюся над тымі хто ў цяжкасцях,
ці баюся запэцкаць рукі? Служу толькі мне самаму ці служу іншым, як Хрыстус”.
Пантыфік
нагадаў пра важнасць інтэграцыі мігрантаў і бежанцаў у грамадства, іх суправаджэнне.
Паводле Папы, мігранты маюць права быць дзейснай часткай свайго новага грамадства
і неабходна дапамагаць ім у рэалізацыі гэтага права.
“Служыць і суправаджаць
азначае таксама абараняць, станавіцца на бок самых слабых”, - сказаў Францішак. Папа
заклікаў, каб абаронай бедных займаліся не толькі “спецыялісты”, але таксама святары,
парафіі і рухі, а асаблівым чынам члены манаскіх супольнасцяў. “Дарагія законнікі
і законніцы, пустыя манастыры не патрэбны Касцёлу для таго, каб рабіць з іх гатэлі
і зарабляць грошы. Пустыя манастыры не нашы, яны для цела Хрыста, якім з’яўляюцца
бежанцы”, - сказаў Святы Айцец.
Папа заклікаў, каб хрысціянскія супольнасці
станавіліся больш салідарнымі і каб у іх любоў рэалізоўвалася канкрэтным чынам.