Папа да святароў: суправаджайце вернікаў і распальвайце іх сэрцы
Мужная крэатыўнасць,
навяртанне душпастыраў і іх адкрытасць на вернікаў. Гэта некаторыя тэмы, якія папа
Францішак закрануў падчас сустрэчы з духавенствам Рымскай дыяцэзіі. Яна адбылася 16
верасня ў базыліцы св. Яна на Латэране. Звяртаючыся да сабраных святароў Пантыфік
падкрэсліў неабходнасць зыходу на “экзістэнцыяльныя перыферыі”, якія між іншым тычацца
“слабых і бедных стыляў мыслення”. Падчас сустрэчы Папа адказаў на некаторыя пытанні,
канстатуючы, што “Касцёл не разбураецца”, а знаходзіцца ў такім добрым стане як ніколі
раней. Пантыфік нагадаў, што некаторыя святыя, як напрыклад Маці Тэрэза з Калькуты,
шануюцца вялікай колькасці некатолікаў, а штодзённая святасць шматлікіх мужчын і жанчын
“дае надзею”. “Святасць большая за скандалы”, - адзначыў ён. Францішак падзяліўся
са святарамі сваімі жыццёвым досведам, расказаў пра служэнне ў Буэнас-Айрэсе і папрасіў
аб малітве, асабліва з нагоды 60-годдзя распазнання ім паклікання да святарства, якое
будзе адзначаць 21 верасня.
Святы Айцец звярнуў увагу святароў на важнасць
пераадолення стомленасці ў выкананні душпастырскай місіі, а таксама чэрпання сілаў
у малітве перад табернакулюмам, сяброўстве з іншымі святарамі і біскупам. Паводле
Папы, на гэтым шляху, важнай з’яўляецца памяць пра пачатак: пакліканне, паступленне
ў семінарыю, святарскае пасвячэнне.
Сярод тэмаў, якія Пантыфік абмеркаваў
са святарамі былі праблемы разведзеных асобаў і тых, хто жывуць супольна без шлюба.
Ён падкрсэсліў, што іх праблемы не абмяжоўзваюцца толькі магчымасцю ці немагчымасцю
прыняцця эўхарыстычнай камуніі, а нашмат глыбейшыя – яны тычацца адказнасці Касцёла
за сем’і, якія жывуць у такіх сітуацыях. Папа адзначыў, што дадзеныя пытанні будзе
абмеркоўваць з групай кардыналаў на пачатку кастрычніка, а таксама падчас Сінода Біскупаў.
Гэту праблему Францішак назваў экзістэнцыяльнай перыферыяй. Паводле Папы, святары
павінны “суправаджаць” вернікаў. Ён нагадаў прыклад Езуса, які “суправаджаў і распальваў
сэрцы” вучняў на дарозе ў Эмаўс.
Святы Айцец заклікаў рымскіх святароў станавіцца
на шлях “мужнай крэатыўнасці” і расказаў пра некаторыя ініцыятывы, сведкам якіх быў
у Буэнас-Айрэсе, як напрыклад адкрыццё касцёлаў на працягу ўсяго дня і прысутнасць
у іх святароў, для таго, каб кожны чалавек мог паспавядацца.