Кардынал Сандры: законы ў Казахстане не перашкаджаюць рэлігійнай свабодзе
17 верасня закончыўся
візіт кардынала Леанарда Сандры, прэфекта Кангрэгацыі па справах Усходніх Касцёлаў
у Казахстан. У яго рамках пурпурат асвяціў новы храм пабудаваны ў цэнтры Астаны ў
гонар св. Язафата Кунцэвіча. У якасці падарунка Папы ён перадаў мясцовай супольнасці
келіх і частку рэліквій гэтага святога, якія захоўваюцца ў ватыканскай базыліцы. У
інтэрв’ю ватыканскаму радыё іерарх падзяліўся, што галоўнай мэтай яго падарожжа была
сустрэча з грэка-каталіцкай супольнасцю Казахстана, але ён меў таксама магчымасць
сустрэцца з католікамі лацінскага абраду, наведаць галоўную сталічную мячэць і паразмаўляць
з імамам Астаны. Акрамя таго кардынал Сандры наведаў праваслаўны катэдральны сабор
сталіцы Казахстана.
“Я б сказаў, што дзякуй Богу, Казахстан – гэта краіна ў
якой ёсць магчымасць рэлігійнага жыцця заснаванага на рэлігійнай свабодзе, на практыкаванні
рэлігійнай свабоды, на дыялогу, на ўзаемнай павазе і такім чынам таксама і маленькая
каталіцкая супольнасць робіць свой маленькі ўклад у гэты дух згоды і разумення, які
існуе паміж усімі рэлігійнымі кампанентамі прысутнымі тут, асабліва з мусульманамі,
якіх большасць і Праваслаўнай Царквой. Дзякуй Богу законы дазваляюць практыкаванне
рэлігійнай свабоды. Тут пануе атмасфера міра і адзінства паміж усімі”, - падкрэсліў
пурпурат.
Кардынал Сандры звярнуў увагу на тое, што падчас кожнай яго сустрэчы
ў рамках падарожжа, вернікі былі паяднаны з Папам у малітве за мір у свеце і асабліва
ў Сірыі.