Папа да “Рыцараў Калумба”: быць сілай для духоўнага абнаўлення грамадства
Працягваць пошук новых
шляхоў, каб быць зачынам Евангелля ў свеце і сілай для духоўнага абнаўлення грамадства.
З такім заклікам папа Францішак звярнуўся да членаў дэлегацыі буйной каталіцкай арганізацыі
“Рыцары Калумба”. 10 кастрычніка 2013 г. Святы Айцец прыняў іх на аўдыенцыі ў Клеменційскай
Зале Апостальскага палацу. Папа падзякаваў “Рыцарам Калумба” за малітву за яго і за
патрэбы Касцёла ў свеце. Выказаў удзячнасць за падтрымку Апостальскай Сталіцы праз
фонд “Vicarius Christi Fund” – знак салідарнасці з клопатам Наступніка св. Пятра аб
Паўсюдным Касцёле, а таксама праз апостальскую дзейнасць, якую члены арганізацыі здзяйсняюць
у мясцовых радах, парафіях і супольнасцях. “Малітва, сведчанне веры, увага да патрэбаў
самых патрабуючых, няхай заўсёды будуць стаўпамі, якія падтрымліваюць вашу асабістую
і супольную дзейнасць”, - пажадаў Папа. Пантыфік даверыў “Рыцараў Калумба” заступніцтву
св. Юзафа, апекуна Святой Сям’і з Назарэта, які з’яўляецца прыкладам мужнай дабрачыннасці,
сілы, цэласнасці і вернасці – цнотаў, якія члены арганізацыі намагаюцца захоўваць,
развіваць і перадаваць будучым пакаленням католікаў.
“Рыцары Калумба” з’яўляюцца
самай буйной у свеце асацыяцыяй свецкіх вернікаў – у яе уваходзяць каля 1,8 млн. чалавек,
якія займаюцца дабрачыннай і евангелізацыйнай дзейнасцю. За 2012 г. імі была сабрана
рэкордная колькасць ахвяраванняў – 167,5 млн. долараў. Акрамя свецкіх католікаў у
арганізацыю ўваходзяць больш за 100 іерархаў, з якіх 11 кардыналы.