Беларусь: ватыканскі дыпламат сустрэўся з арыштаваным святаром
Апостальскі нунцый
у Беларусі арцыбіскуп Клаўдыё Гуджэроцці 25 кастрычніка 2013 г. сустрэўся з кс. Уладзіславам
Лазарам, які ўжо некалькі месяцаў знаходзіцца ў следчым ізалятары КДБ у Мінску. Як
паведамляе інтэрнэт-партал Каталіцкага Касцёла ў Беларусі (catholic.by), кс. Лазар
“выглядае выпрабаваным турэмным зняволеннем, але цвярозым і рашучым”. Як сказаў ён
сам падчас сустрэчы з ватыканскім дыпламатам, “арышт не перашкодзіў яму жыць глыбокім
духоўным досведам”. Святар прызнаўся, што “з’яўляецца патрыётам, любіць Беларусь,
чакае справядлівага рашэння” і “прабачыў тым, хто стаўся прычынай ягоных пакутаў”.
Сустрэча
трывала каля гадзіны і адбывалася ў прысутнасці адказнага за следства і прадстаўніка
Міністэрства замежных спраў Беларусі, які выконваў абавязкі перакладчыка.
Апостальскі
нунцый запэўніў арыштаванага святара ў асабістай блізкасці папы Францішка і ўсяго
Каталіцкага Касцёла ў Беларусі. Ён перадаў кс. Лазару падарунак Пантыфіка – ружанец.
Кс. Уладзіслаў папрасіў аб малітве за яго і зазначыў, што адчувае блізкасць Каталіцкага
Касцёла.
Размова мела нефармальны, братэрскі характар і скончылася супольным
пажаданнем, каб следства было завершана як мага хутчэй.