Для супрацьстаяння
“культуры марнасці” патрэбна працяглае хрысціянскае выхаванне, перакананы кардынал
Жуан Браз дэ Авіс, прэфект Кангрэгацыі па справах Інстытутаў кансэкраванага жыцця
і Таварыстваў апостальскага жыцця. Іерарх прыняў удзел у канферэнцыі на тэму “Вернасць
і настойлівасць у пакліканні ў кантэксце культуры марнасці”. Яна адбылася 29 кастрычніка
2013 г. у Папскім універсітэце “Антаніянум” у Рыме. У інтэрв’ю Ватыканскаму радыё
кардынал Браз дэ Авіс адзначыў, што захаваць вернасць любому пакліканню людзям становіцца
усё складаней, асабліва перад абліччам сённяшняй культуры, для якой няма нічога канчатковага
і вечнага, дзе ўсё трывае “пакуль гэта мне падабаецца, пакуль гэта робіць мяне шчаслівым...”.
Паводле пурпупарата, у такім кантэксце варта паглыбіць разважанне над вяртаннем да
вернасці, якая будзе трывалай і па-сапраўднаму сардэчнай.
Асаблівую ўвагу ён
звярнуў на важнасць пастаяннага кантакту з Божым словам. “Слова Божае – сябар чалавека,
слова Божае– блізкае, не далёкае; яно не накладае цяжар, але дае ўмовы для шчасця.
Калі ім не жывём упоўні, не жывём з пастаянным намаганнем, можа здарыцца, што частка
нашага жыцця пачне імкнуцца да іншых станаў, якія не паходзяць ад Божага слова. І
гэта стварае цяжкасці”, - сказаў кардынал Браз дэ Авіс і падкрэсліў, што фундаментальнымі
з’яўляюцца пастанныя адносіны з Богам.