“Веру, ведаю, разумею”. Лячэнне духоўных хваробаў: сквапнасць і шчодрасць
Мы працягваем цыкл
праграм пад назвай “Лячэнне духоўных хваробаў”, у рамках якога размаўляем пра духоўныя
немачы і сродкі, неабходныя для перамогі над імі. Сёння ў цэнтры нашай увагі будзе
чарговая хвароба – сквапнасць. У якасці адпраўдной кропкі ў разважанні над гэтай немаччу
пахілімся над урыўкам з Першай Кнігі Валадарстваў, дзе апавядаецца пра караля Ахаба,
які меў вялікую маёмасць. Меў шмат, але не задавальняўся гэтым. Ахаб убачыў, што недалёка
ад каралеўскага палацу знаходзіцца вінаграднік Набота ізрээляніна і захацеў авалодаць
таксама і гэтым кавалкам зямлі. Ён прапанаваў гаспадару вінаградніка іншы кавалак
зямлі і грошы, але атрымаў адмову.
“І лёг на ложак свой, і адвярнуўся тварам
да сцяны, і не еў хлеба. І ўвайшла да яго жонка ягоная Ізабэль, і сказала яму: Чаму
засмучана душа твая, чаму ты не ясі хлеба? Ён адказаў ёй: Бо я гаварыў з Наботам ізрээлянінам
і сказаў яму: аддай мне вінаграднік свой за срэбра, або, калі пажадаеш, дам табе іншы
вінаграднік замест гэтага. Тады ён сказаў: Не аддам табе вінаградніку майго. І сказала
яму Ізабэль, жонка ягоная: Ты цяпер валадарыш над Ізраэлем. Устань, еш хлеб і будзь
спакойны: я здабуду табе вінаграднік Набота ізрээляніна” (1 Вал 21,4-7).
Ахаб
меў шмат ўласнасці, але не быў задаволены; быў ненасытным, таму што даброты не могуць
напоўніць патрэбы душы і сэрца. Ён быў у няволі сквапнасці і хутка знайшоў сабе саюзніка,
каб здзейсніць злачынства: па загадзе Ізабэлі, Набот ізрээлянін быў забіты, а яго
вінаграднік стаў маёмасцю Ахаба.
Менавіта cквапнасць нараджае ў нас непатрэбныя
патрэбы, якія аддаляюць нас ад сапраўднага “я”. Яна правакуе ў нас жаданні, якія,
калі ўзрастаюць, цалкам авалодваюць намі, робяць сляпымі і неразважлівымі. З цягам
часу сквапнасць становіцца па-сапраўднаму бескантрольнай. Мы пачынаем шукаць усё большага
і большага задавальнення набываючы рэчы, за якія плацім уласным шчасцем. Сквапнасць
ніколі не зробіць нас задаволенымі, таму што нават калі маем шмат, заўсёды будзем
адчуваць сябе беднымі і нямаючымі чагосьці важнага. На самой справе, сквапнасць прыводзіць
да страты ўсяго.
У рамане Фёдара Дастаеўскага “Браты Карамазавы” ёсць цудоўная
легенда пра сквапную жанчыну, якая патрапіла ў пекла. Яе анёл-ахоўнік бачыў яе пакуты
і зжаліўшыся, нагадаў Богу, што аднойчы яна зрабіла добры ўчынак: ахвяравала бедняку
лук. Тады Бог дазволіў анёлу выцягнуць жанчыну з дапамогай гэтага луку. Убачыўшы,
што жанчына пакідае пякельнае возера, іншыя грэшнікі ухапіліся за яе ногі, каб вылезці
таксама. Але яна іх адшутрхоўвала, кажучы: “Гэта мяне выцягваюць, а не вас, лук мой,
а не ваш”. Як толькі яна сказала гэта, лук разарваўся і жанчына павалілася назад,
дзе пакутуе да сённяшняга дня.
Узнікае пытанне: як вылечыцца ад сквапнасці?
Як і ў выпадках з іншымі хваробамі, неабходна знайсці тое, што будзе супрацьлеглым
гэтай немачы. Маецца на ўвазе шчодрасць у адносінах да іншых. Шчодрасць, якая здзяйсняецца
без умоваў, таму што ўжо ўсё маем у бацькоўскай любові Бога. Шчодрасць – гэта лек,
даступны кожнаму. Яна дазваляе згубіць штосьці сваё, але атрымаць радасць і шчасце.
Толькі дорачы мы можам выйсці з пякельнай адзіноты, куды нас заганяе сквапнасць.
Езус
прасіў даваць міласціну, але само гэта слова азначае не толькі грошы, а таксама салідарнасць,
спачуванне, міласэрнасць, любоў. Плён гэтай любові апісаны ў Дзеях Апосталаў, дзе
гаворка ідзе пра першую хрысціянскую супольнасць: мелі адно сэрца і адну душу, і ніхто
з іх не быў у патрэбе. Яны мелі ўсё, усё неабходнае, і былі шчаслівымі. Сапраўды,
любоў аздараўляе і ад гэтай хваробы.