Беларусь: трывае падрыхтоўка да Чэмпіянату Еўропы па футболе сярод святароў
24-28 лютага 2014
г. горад Ліда стане сталіцай VIII Чэмпіянату Еўропы па міні-футболе сярод святароў.
У Беларусі гэта спаборніцтва адбудзецца ўпершыню. Магчыма, не выпадкова. Ужо некалькі
гадоў беларускія святары ўдзельнічаюць у еўрапейскіх чэмпіянатах і кожны раз паказваюць
усё лепшыя вынікі, што і заўважылі ў аргкамітэце Чэмпіянату Еўропы. Аб падрыхтоўцы
да еўрапейскага турніру мы запыталі кс. Паўла Салабуду, капітана каманды Гродненскай
дыяцэзіі і арганізатара маючага адбыцца спаборніцтва з боку Каталіцкага Касцёла Беларусі.
Кс. Павел, колькі разоў беларускія святары змагаліся за Кубак і чаго атрымалася
дасягнуць?
Беларускія святары ўдзельнічалі ўжо ў трох Чэмпіянатах, якія
праходзілі ў Польшчы, Венгрыі і Славеніі. Калі ехалі першы раз, нават не думалі, што
будзе такі ўзровень. І тады мы занялі апошняя месца. Наступныя разы мы былі на 8 і
9 месцы сярод 13 каманд. Можна заўважыць наш маленькі прагрэс. Таксама і тое, што
ўзровень гэтых спаборніцтваў вельмі высокі. Калі раней, напрыклад, былі толькі чатыры
каманды высокага ўзроўню – палякі, партугальцы, баснійцы і харваты, то на апошніх
спаборніцтвах былі і іншыя добра падрыхтаваныя каманды. Партугальцы былі шостымі,
а славакі – чацвёртымі. Мы гулялі з партугальцамі і прайгралі толькі два мячы.
Колькі
футбольных каманд сярод святароў існуе ў Беларусі? Вядома, Беларусь на еўрапейскім
спаборніцтве прадставіць зборная краіны. Як фарміравалі склад каманды?
На
сённяшні дзень у Беларусі існуе 4 каманды – Гродненскай, Віцебскай, Пінскай дыяцэзій
і Мінска-Магілёўскай архідыяцэзіі. Гэты каманды ўдзельнічаюць у Чэмпіянаце Беларусі
па міні-футболе сярод святароў, які сёлета адбыўся ў Лепелі, ужо ў другі раз. Мы запрасілі
прафесійнага трэнера. Ён паглядзеў, як гуляюць у футбол святары не толькі Гродненская
дыяцэзіі, але і іншых дыязэзій. На VIII Чэмпіянаце Еўропы ў нашай камандзе будуць
гуляць, вядома, найлепшыя.
Ці ёсць прафесійныя спартсмены ў камандзе? І
як ідзе падрыхтоўка да Чэмпіянату Еўропы?
Прафесійных спартсменаў у камандзе
няма, гуляе той, каму проста падабаецца гуляць у футбол. Падрыхтоўка, у першую чаргу,
гэта ўдзел у Чэмпіянаце Беларусі, на якім ужо два гады запар перамаглі святары Гродненскай
дыяцэзіі. А зараз мы збіраемся раз у тыдзень і гуляем, каб лепш падрыхтавацца да еўрапейскага
турніру.
Акрамя выключна спартыўнай складаючай, што прынясе краіне і Каталіцкаму
Касцёлу правядзенне Чэмпіянату менавіта ў Беларусі?
Спартыўныя сустрэчы
такога фармату перш за ўсё маюць духоўна-інтэграцыйны характар і дазваляюць святарам
з розных краін лепш пазнаць адзін аднаго, святары пазнаёмяцца з нашымі традыцыямі,
з нашымі людзьмі, з верай беларусаў. Яны, напэўна, будуць пад уражаннем ад таго, наколькі
нашы людзі любяць Бога і Касцёл. Акрамя спаборніцтва, ёсць дзень, калі мы пакажам
нашу краіну – запланаваны выезд у Мір, Нясвіж, калі хопіць часу таксама ў Гродна.
А тыя святары, каманды, якія прыляцяць у Мінск, пабачаць і беларускую сталіцу.
Чым
увогуле адрозніваюцца такія спаборніцтвы ад шматлікіх іншых? Ці каманды проста змагаюцца
за галоўны прыз (залаты медаль, першае месца, кубак), ці ёсць іншыя, звышмэты?
Спаборніцтва
– гэта перш за ўсё змаганне. І кожны хоча перемагчы. У гэтым годзе, напэўна, больш
за ўсіх хочуць гэтага беларускія святары. Таксама гэта магчымасць для святара трымаць
сябе ў добрым стане, добрае здароўе спрыяе добраму выкананню абавязкаў. Гавораць,
у здаровым целе – здаровы дух. Спорт гартуе цела, гартуе дух, выхоўвае да адказнасці,
салідарнасці, узаемадапамогі. Усе мы ведаем, што благаслаўлёны папа Ян Павел II вельмі
любіў спорт і шмат ім займаўся. На такіх спаборніцтвах вельмі добрая атмасфера. Я
запрашаю ўсіх наведаць VIII Чэмпіянат Еўропы па міні-футболе сярод святароў. Нават,
калі першы Чэмпіянат Беларусі праходзіў у Лідзе, прыйшло вельмі шмат людзей. Хтосьці
адзначыў, што, калі ў Лідзе гуляла прафесійная каманда, не было столькі заўзятараў.
Спадзяюся, што і на Чэмпіянат Еўропы ў лютым 2014 г. прыйдзе шмат людзей, каб нас
падтрымаць.