Пантыфік выказаў спачуванні ў сувязі са смерцю іракскага кардынала
9 красавіка 2014 г.
у ЗША памёр былы Патрыярх Халдэйскай Каталіцкай Царквы, кардынал Эмануэль ІІІ Дэлі.
Ён праходзіў лячэнне ў адным са шпіталёў Сан-Дыега ў Каліфорніі. Папа Францішак выказаў
спачуванне ў сувязі са смерцю іерарха. Пантыфік прызнаўся, што “быў глыбока засмучаны”
весткай пра смерць кардынала, якога “успамінае з глыбокай удзячнасцю”. Святы Айцец
адзначыў “адданасць памерлага Патрыярха свайму народу і яго імкненне да паважлівых,
справядлівых і мірных адносін з паслядоўнікамі іншых рэлігійных традыцый”. Папа даверыў
яго “высакародную душу” бясконцай Божай міласэрнасці.
Эмануэль III Дэлі нарадзіўся
6 кастрычнік 1927 г. на тэрыторыі архіепархіі Масул. Стаў святаром у 1952 г. Праз
10 гадоў Святы Сінод Халдзейскай Каталіцкай Царквы прызначыў яго дапаможным епіскапам
Вавілонскага Патрыярхату, што у адпаведнасці са звычаямі і правіламі, прынятымі ва
Усходніх Цэрквах, пацвердзіў праз некалькі тыдняў папа Павел VI. 3 снежня 2003 г.
ён быў абраны Патрыярхам Вавілоніі.
Яшчэ да гэтага выбару, і неўзабаве пасля
пачатку вайны ў Іраку, 22 сакавіка 2003 г. іерарх быў лёгка паранены асколкам падчас
бамбёжкі Патрыярхату, але не пакінуў сталіцы. Ён стараніўся палітыкі. І толькі ў маі
2007 г. упершыню з пачатку вайны пракаментаваў сітуацыю ў Іраку. Ён абвінаваціў улады
гэтай краіны і замежныя ўзброеныя сілы ў пасіўнасці адносна насілля. Ён казаў пра
цяжкія ўмовы, у якіх апынуліся хрысціяне, стаўшы перад абліччам знікнення з іракскай
зямлі. У калегію кардыналаў яго ўключыў Бэнэдыкт XVI 24 лістапада 2007 г. У 2012 г.
ён пакінуў пасаду з-за ўзросту і па стане здароўя. Пахаванне памерлага іерарха адбудзецца
12 красавіка ў Дэтроіце, дзе жыве вялікая супольнасць католікаў халдэйскага абраду.
Са
смерцю кардынала Эмануэля III Дэлі, Калегія кардыналаў налічвае 216 членаў з 67 краін,
з якіх 120 з’яўляюцца выбаршчыкамі. З гэтага часу ў ёй не засталося ніводнага кардынала
іракскага паходжання.