Былы фатограф Папы: святасць Яна Паўла ІІ праяўляецца ў крыжы
“Тое, што я змог працаваць
разам з абодвума будучымі святымі – гэта для мяне вялікі гонар”, - сказаў у інтэрв’ю
Ватыканскаму радыё Артура Мары, які на працягу больш за 50 гадоў з’яўляўся папскім
фатографам. Ён суправаджаў Яна ХХІІІ і Яна Паўла ІІ не толькі падчас іх публічных
сустрэч, але таксама ў вельмі асабістых момантах жыцця. Ён адзначыў, што Добры Папа
прыцягваў да сябе людзей сваёй прастатой і ўсмешкай. “Разам з ім дзверы Ватыкану сталі
адчыненымі і пачаў ён выходзіць да людзей. Але надзвычайным было тое, што Ян ХХІІІ
памятаў пра кожнага са сваіх працаўнікоў. Ён мог раптам павярнуцца і спытацца: “як
ідуць справы ў цябе?”, - пахваліўся Артура Мары. Ён таксама нагадаў, што з кардыналам
Вайтылаю сустрэўся падчас Другога Ватыканскага Сабору. “Ужо тады можна было заўважыць,
што ён адрозніваўся ад іншых”, - сказаў фатограф.
Артура Мары падкрэсліў, што
Ян Павел ІІ быў чалавекам малітвы. “Я бачыў вынікі яго малітвы: людзі атрымлівалі
назад згубленую веру, супакой, мір і надзею”, - сказаў былы фатограф і дадаў, што
назіраў за Янам Паўлам ІІ калі ён маліўся. “Гэта была надзвычайная падзея, падчас
якой змяняўся ягоны твар і позірк”, - адзначыў Мары. Ён нагадаў словы Яна Паўла ІІ,
які заўсёды казаў, што позірк ніколі не можа здраджваць чалалвека і таму глядзеў сваім
суразмоўцам прама ў вочы.
У канцы інтэрв’ю Артура Мары адзначыў, што іконаю
27 гадоў служэння Яна Паўла ІІ Касцёлу і яго святасці з’яўляецца апошняе фота, якое
ён зрабіў будучаму святому ў Вялікую Пятніцу. На ім Ян Павел ІІ трымае ў руках крыж
у сваёй прыватнай капліцы ў Ватыкане, калі сачыў па тэлебачанні за ходам Крыжовага
Шляху ў рымскім Калізеі. “У той момант абапіраўся на гэты крыж і прасіў дапамогі;
раней з гэтым крыжам падарожнічаў па ўсім свеце. Крыж заўсёды быў яго сілай і ўвесь
яго жыццё было прысвечана таямніцы крыжа”, - сказаў Артура Мары.