Францішак у Бэтлееме: сітуацыя дзяцей – дыягназ для грамадства
“І вось вам знак:
знойдзеце Немаўля спавітае і пакладзенае ў яслях”, – гэтымі евангельскімі словамі
Святы Айцец пачаў сваю гамілію падчас Эўхарыстыі на плошчы перад базылікай Божага
Нараджэння ў Бэтлееме 25 мая 2014 г. Пантыфік нагадаў, што Дзіцятка Езус, народжанае
ў Бэтлееме, было знакам, які Бог даў тым, хто чакаў збаўлення, і застаецца знакам
Божай пяшчоты і прысутнасці ў свеце. “Таксама і сёння, дзеці – гэта знак. Знак надзеі,
знак жыцця, але таксама “дыягнастычны” знак, неабходны для разумення стану здароўя
сям’і, грамадства, усяго свету. Калі дзеці прымаюцца, калі іх любяць, бароняць – тады
і сям’я здаровая, грамадства развіваецца, а свет становіцца больш гуманным”, адзначыў
Папа. Ён дадаў, што сёння дзеці маюць патрэбу ў прыняцці і абароненасці, ад свайго
зачацця ва ўлонні маці. Францішак падкрэсліў, што, на жаль, у наш час высокіх тэхналогій,
шмат дзяцей прабываюць у нечалавечых умовах, жывуць на ўзбочыне грамадства, на перыферыях
вялікіх гарадоў і сёлаў. “Шмат дзяцей яшчэ сёння выкарыстоўваецца, зневажаецца, пераўтвараецца
ў рабоў, становіцца аб’ектамі насілля і незаконнага гандлю”, - падкрэсліў Папа. Ён
нагадаў пра лёс дзяцей-бежанцаў, якія гінуць у водах Міжземнамор’я. “Усяго гэтага
мы саромеемся сёння перад абліччам Бога, Бога – які стаў Немаўляці”, - адзначыў Папа.
Папа
нагадаў пра плач міліёнаў дзяцей ва ўсім свеце, які не павінен пакінуць абыякавымі.
“У свеце, які штодзённа выкідвае тоны ежы і лекаў, ёсць дзеці, якія плачуць ад голаду
і хвароб, лёгка вылечных. У свеце, які абвяшчае клопат аб непаўналетніх, гандлююць
зброяй, што трапляе ў рукі дзецей-салдат; гандлююць прадуктамі, зробленымі рукамі
маленькіх працаўнікоў-рабоў. Іх плач заглушаецца – плач гэтых дзяцей заглушаецца!”,
- падкрэсліў Папа.
Францішак заклікаў паглядзець на жыццё дзяцей у грамадствах
і даць пачатак новаму стылю жыцця, дзе больш не будзе канфліктаў, злоўжыванняў, спажывецтва,
але настане братэрства, прабачэнне, згода, дзяленне і любоў.
У літургіі на
плошчы перад базылікай Божага Нараджэння прынялі ўдзел каля 10 тыс. чалавек – менавіта
такую колькасць вернікаў яна магла ўмясціць. На заканчэнне Эўхарыстыі Папа разам з
вернікамі прамовіў велікодную марыйную малітву “Regina Coeli”.