Пантыфік ў Вячэрніку: адсюль Касцёл выйшаў з падзеленым хлебам і любоўю ў сэрцы
Тут нарадзіўся Касцёл
і адсюль выйшаў, з падзеленым хлебам у руках, з ранамі Езуса перад вачыма, і Духам
любові ў сэрцы, адзначыў папа Францішак падчас Эўхарыстыі, якую цэлебраваў 26 мая
2014 г. у месцы Апошняй Вячэры. У сувязі з тым, што памяшканне Вячэрніка невялікае,
св. Імша прайшла ў невялікім коле. Разам з Пантыфікам літургію цэлебравалі ардынарыі
Святой Зямлі. Менавіта у гэтым месцы, нагадаў Папа, уваскрослы Хрыстус удыхнуў у вучняў
Святога Духа, каб Яго сілай пераманялі аблічча зямлі. Касцёл захоўвае памяць пра ўсё,
што адбылося тады, адзначыў ён і дадаў, што Дух Суцяшыцель нагадвае кожнае слова,
кожны жэст і адкрывае іх сэнс. Вячэрнік, на думку Святога Айца, нагадвае пра важнасць
служэння, таму што тут Езус абмыў ногі апосталам; пра самаахвяраванне, бо менавіта
тут была ўстаноўлена Эўхарыстыя; пра сяброўства, таму што Пан учыніў людзей сваімі
сябрамі; пра развітанне з Настаўнікам і абяцанне прабывання сярод Яго сяброў. Адначасова,
Вячэрнік нагадавае пра подласць і здраду. Кожны можа здрадзіць Хрыста сваімі грахамі,
высакамернасцю і асуджэннем бліжніх, лічыць Папа.
Вячэрнік нагадвае пра нараджэнне
новай сям’і – Касцёла, заснаванага ўваскрослым Езусам, пра дзяленне, братэрства і
мір паміж людзьмі. “Колькі любові, колькі дабра вылілася з Вячэрніка. Колькі міласэрнасці
выйшла адсюль, як з крыніцы ракі, якая напачатку з’яўляецца струменем, а затым пашыраецца
і становіцца вялікай. Усе святыя чэрпалі адсюль, вялікая рака святасці Касцёла заўсёды
бярэ пачатак адзсюль, заўсёды абнаўляецца з Сэрца Езуса, Эўхарыстыі і Святога Духа”,
- сказаў Папа.
Гарызонт Вячэрніка, паводле Францішка, гэта гарызонт уваскрослага
Хрыста і Касцёла – гарызонт чакання новага спаслання Святога Духа. “Няхай сыдзе Дух
Твой і абновіць аблічча зямлі!”, - заклікаў Пантыфік.
Св. Імша ў месцы Апошняй
Вячэры стала завяршальным пунктам пілігрымкі папы Францішка ў Святую Зямлю.