Папа да іерусалімскага муфтыя: нашчадкі Абрагама павінны быць будаўнікамі міру і справядлівасці
Трэці дзень апостальскага
падарожжа ў Святую Зямлю папа Францішак пачаў з візіту на Храмавую гару ў Іерусаліме,
дзе знаходзяцца мячэць Аль-Акса і мусульманская святыня Купал Скалы. Тут Пантыфік
сустрэўся з Вялікім муфтыем Іерусаліма Мухамадам Ахмад Хусэйнам і іншымі мусульманскімі
лідэрамі. У сваёй прамове да іх Папа адзначыў, што мэта яго пілігрымкі звязана з наведваннем
месцаў зямнога жыцця Езуса Хрыста, і яна не была б поўнай без сустрэчы з асобамі і
супольнасцямі, якія жывуць на гэтай зямлі, асабліва з вызнаўцамі ісламу.
Папа
нагадаў што мусульман, хрысціян і юдэяў аб’ядноўвае пашана да асобы Абрагама. Ён стаў
пілігрымам, пакінуўшы ўласную зямлю і ўласны дом, каб пачаць духоўнае падарожжа, да
якога Бог яго клікаў. І гэта, на думку Францішка, павінна быць прыкладам для сучасных
вернікаў. Нельга заставацца самадастатковымі, закрытымі і ўпэўненымі ва ўласных перакананнях.
“Перад таямніцай Бога мы адчуваем, што павінны быць гатовымі выйсці за свае рамкі,
паслухмяныя закліку, скіраванаму Богам, адкрытыя на будучыню, якую Ён хоча пабудаваць
для нас”, - сказаў Папа. Паводле Святога Айца, Бог жадае, каб вернікі розных рэлігій
былі сведкамі Яго дзейнасці ў свеце і для гэтага неабходна быць будаўнікамі міру і
справядлівасці.
Напрыканцы сустрэчы Святы Айцец скіраваў заклік да усіх людзей
і супольнасцяў, якія шануюць Абрагама, каб паважалі і любілі адно аднаго як браты
і сёстры, вучыліся разумець іншага. “Няхай ніхто не выкарыстоўвае імя Бога для апраўдання
насілля! Будзем працаваць разам дзеля справядлівасці і міру!”, - заклікаў Пантыфік.