Католікі з Паўночнай Карэі могуць сустрэцца з Папам
Сеульская архідыяцэзія
звярнулася да ўладаў Паўночнай Карэі, каб дазволілі групе з 10 мясцовых католікаў
удзельнічаць у св. Імшы, якую папа Францішак узначаліць у Сеуле падчас свайго візіту
ў Паўднёвую Карэю 14-18 жніўня 2014 г. Адказ чакаецца ў пачатку жніўня, паведаміў
прадстаўнік архідыяцэзіі кс. Гур Юнг-юп. Перад прыходам да ўлады камуністаў у Паўночнай
Карэі па розных дадзеных там жыло ад 50 да 100 тыс. католікаў і ў два разы больш пратэстантаў.
У цяперашні час не можна вызначыць колькасці хрысціян, бо яны вымушаны хаваць сваю
веру, таму што яе вызнанне пагражае вельмі суровым пакараннем: турэмным зняволеннем
або працоўным лагерам, і часам смерцю. Па афіцыйных дадзеных, сярод 24 млн. паўночных
карэйцаў толькі 12 пратэстантаў і 800 католікаў. Паўночнакарэйская канстытуцыя фармальна
гарантуе свабоду рэлігіі, але ў рэчаіснасці яна там не існуе. На практыцы, адзінай
прымальнай формай рэлігіі з’яўляецца культ першага камуністычнага дыктатара Кім Ір
Сэна і яго нашчадкаў, якія кіруюць краінай.
Хоць у сталіцы Пхеньяне ёсць тры
храмы – два пратэстанцкіх і адзін каталіцкі –на самой справе яны даступныя толькі
для турыстаў, дыпламатаў і членаў міжнародных пазаўрадавых арганізацый. У якасці духавенства
ў іх працуюць функцыянеры аб’яднанняў, створаных уладамі і імі кантраляваных. На працягу
некалькіх гадоў дзейнічае таксама праваслаўная царква, пабудаваная Маскоўскім Патрыярхатам
са згоды Кім Чэн Іра, але яна прызначана толькі для замежных грамадзян.
Паводле
ацэнак праваабарончых арганізацый, у Паўночнай Карэі больш за 200 тыс. чалавек сядзяць
у турмах па палітычных або рэлігійных матывах. Сярод іх, па меншай меры 30 тыс. хрысціян.
Святая
Імша ў цэнтры Сеўла адбудзецца 16 жніўня 2014 г. і будзе звязана з беатыфікацыяй 124
карэйскіх мучанікаў. Яшчэ адной мэтай падарожжа Папы стануць Азіяцкія дні моладзі.
Гэта будзе трэці візіт Біскупа Рыма ў Карэю – раней, у 1984 г. і 1989 г., краіну наведваў
Ян Павел II. Карэйскае грамадства з энтузіязмам успрыняло пілігрымку Святога Айца.
Усе чакаюць, што візіт можа прынесці мір для ўсяго рэгіёну.
У Паўднёвай Карэі
5,3 млн. католікаў. Гэта трэцяя па велічыні і самая хуткарослая рэлігійная група ў
краіне. Трэба адзначыць, што Карэя з’яўляецца адзінай краінай у Азіі, дзе Каталіцкі
Касцёл паўстаў практычна без удзелу еўрапейскіх місіянераў.