Апостальская Сталіца: і Ізраіль, і Палестына парушаюць правы чалавека
Апостальская Сталіца
заклікала міжнародную супольнасць узмацніць уздзеянне на ізраільцян і палестынцаў
у канфлікце ў сектары Газа. Гаворка павінна ісці пра неадкладнае спыненне агню і рэгулярныя
перамовы па мірным урэгуляванні, заявіў прадстаўнік Святога Пасаду пры Арганізацыі
Аб’яднаных Нацый у Жэневе, арцыбіскуп Сільвана Тамазі, у ходзе спецыяльнай сесіі Савета
ААН па правах чалавека 23 ліпеня 2014 г. “Заганнаму колу помсты” павінен быць пакладзены
канец. У адваротным выпадку над насіллем будзе згублены кантроль, падкрэсліў ватыканскі
дыпламат. Святы Пасад лічыць, што абодва бакі парушаюць правы чалавека. Забойства
“мірных жыхароў” падчас ізраільскай ваеннай акцыі “так жа непрымальна, як і ракетны
абстрэл па грамадзянскіх мэтах у Ізраілі”, сказаў арцыбіскуп Тамазі. Здаецца, што
голас розуму губляецца ў грукаце вайны, дадаў ён.
“Насілле нікуды не прывядзе,
ні цяпер, ні ў будучыні”, - сказаў прадстаўнік Апостальскай Сталіцы. Спасылаючыся
на папу Францішка, ён заклікаў ізраільцян і палестынцаў да мужнасці ісці ў накірунку
міра, які абапіраецца на ўсебаковым прызнанні права дзвюх дзяржаў. Міжнародная супольнасць
павінна ўзяць на сябе адказнасць па сур’ёзнай дапамозе і ўдзеле ў мірным рашэнні канфлікту
і спыненні насілля, сказаў іерарах. Ён заклікаў сродкі масавай інфармацыі да “справядлівага
і бесстаронняга інфармавання аб трагедыі ўсіх, хто пакутуе па прычыне канфлікту”.
Па
меншай меры 23 палестынцы былі забітыя ў сектары Газа ў ноч на 24 ліпеня 2014 г. Агульная
колькасць ахвяр распачатай 8 ліпеня аперацыі ізраільскай арміі дасягнула 718 чалавек,
больш за 4 тыс. палестынцаў атрымалі раненні. Пра гэта паведамляюць мясцовыя медыцынскія
службы. З 8 ліпеня баевікі з сектара Газа запусцілі 2270 ракет па гарадах Ізраіля,
адзначылі ў прэс-службе арміі яўрэйскай дзяржавы. У выніку гэтых абстрэлаў у Ізраілі
загінулі тры чалавекі, каля 300 атрымалі раненні. За тыдзень у баях у сектары Газа
загінулі 32 ізраільскіх салдаты і афіцэры, больш за 150 вайскоўцаў атрымалі раненні.