Рыхтуецца сустрэча Папы з нунцыямі ў краінах Блізкага Усходу
Кардынал Філоні, прызначаны
пасланнікам папы Францішка ў Ірак, з’яўляецца найбольш адпаведнай асобай для гэтага
задання, лічыць кс. Фэдэрыка Ламбардзі. Езуіт нагадаў, што сённяшні прэфект Кангрэгацыі
Евангелізацыі Народаў быў Апостальскім нунцыем у Іраку і Іарданіі ў апошнія гады праўлення
Садама Хусэйна, у часы вайны і першыя гады спробаў аднаўлення мірнага жыцця ў краіне.
“Падчас вайны, ён верна і адважна заставаўся у Багдадзе, нягледзячы на бамбардзіроўкі
і быў практычна адзіным замежным дыпламатам, які не пакідаў краіну ў дадзенай сітуацыі.
Такім чынам ён з’яўляецца асобай мужнай, асобай, якая прадэманстравала любоў на насельніцтва
Ірака і рэгіёна, з вялікай адданасцю. Ён можа ведаць сітуацыю і глыбока зразумець
праблемы і боль гэтых людзей”, - сказаў кс. Ламбардзі.
Кіраўнік Залы Друку
распавёў, што ўсім Апостальскім нунцыям ў блізкаўсходнім рэгіёне, было дадзена заданне
пазнаёміць прадстаўнікоў мясцовых палітычных і рэлігійных уладаў са зместам і значэннем
звароту папы Францішка ў сувязі з гуманітаранай драмай у Іраку, з мэтай спрыяць духу
малітвы і салідарнасці на карысць пакутуючых людзей. Акрамя таго, разглядаецца магчымасць
сустрэчы папскіх дыпламатычных прадстаўнікоў на Блізкім Усходзе са Святым Айцом у
Ватыкане. Гэта сустрэча можа адбыцца ў верасні, падкрэсліў кс. Ламбардзі.