Пантыфік заклікаў біскупаў Азіі весці дыялог з усімі культурамі
17 жніўня 2014 г.
папа Францішак прыбыў у санктуарый Хэмі – месца дзе аддалі жыццё за веру шматлікія
хрысціяне, імёны якіх невядомы. Тут адбылася яго сустрэча з біскупамі Азіі. У сваёй
прамове Францішак звярнуў увагу на ролю Касцёла на гэтым кантыненце, багатым разнастайнасцю
культур. Касцёл пакліканы несці сведчанне Евангелля, праз дыялог і адкрытасць на ўсіх,
адзначыў Папа. Адпраўной кропкай у дадзеным заданні, на яго думку, павінна быць яснае
ўсведамленне католікамі, сваёй хрысціянскай ідэнтычнасці. Каб свабодна, адкрыта і
плённа, камунікаваць з іншымі трэба разумець кім з’яўляемся, што для нас учыніў Езус
і чаго чакае ў адказ, лічыць Пантыфік. Такім чынам важныя сведчанне і дыялог, а моцная
хрысціянская ідэнтычнасць павінна быць краевугольным каменнем. Святы Айцец засяродзіўся
таксама на цяжкасцях, якія неабходна прадбачаць і імкнуцца пазбягаць. Першая з іх
– рэлятывізм. Гэта спакуса, якая ў сённяшнім свеце ўдарае таксама па хрысціянскіх
супольнасцях, падкрэсліў Францішак і дадаў, што гаворка ідзе не толькі пра рэлятывізм
інтэлектуальны, але таксама практычны і штодзённы, які непазбежна аслабляе любую ідэнтычнасць.
Другая
спакуса, на думку Святога Айца, гэта павярхоўнасць: імкненне за модай, уцяканне ад
рэчаіснасці. Гэта сур’ёзная душпастырская праблема, сказаў Папа. Для служыцеляў Касцёла
павярхоўнасць можа праяўляцца ў захапленні душпастырскімі праграмамі і тэорыямі,за
кошт непасрэднай і плённай сустрэчы з вернікамі, асабліва маладымі, якія маюць патрэбу
ў моцнай катэхізацыі і надзейным духоўным кіраўніцтве. Без укаранёнасці ў Хрысце,
праўды, якімі жывем, паступова слабеюць, практыкаванне цнотаў становіцца фармалізмам,
а дыялог зводзіцца да адной з формаў перамоваў, узгадненнем супярэчнасцяў.
Трэцяя
спакуса – гэта жаданне схавацца за простымі адказамі, гатовымі выразамі, законамі
і правіламі, адзначыў Папа. Вера, па сваёй прыродзе не сканцэтравана на самой сабе,
а імкнецца “выходзіць вонкі”, станавіцца больш зразумелай, нараджаць сведчанне і місійнасць.
Паводле Францішка хрысціянская ідэнтычнасць заключаецца галоўным чынам у пашане да
Бога і любові да іншых, служэнні людзям і сведчанні пра Таго, на каго пакладаецца
надзея і давер.
Пасля прамовы Святога Айца ўсе удзельнікі сустрэчы накіраваліся
на супольны абед у сталовай санктуарыя Хэмі.