Чацвёрты дзень апостальскага
падарожжа па Паўднёвай Карэі папа Францішак пачаў з удзялення сакрамэнту хросту, у
капліцы нунцыятуры ў Сеуле. Кожны год у гэтай краіне хрост прымаюць каля 100 тыс.
чалавек, але гэты выпадак быў незвычайны. Па-першае, таму што сакрамэнт удзяліў сам
Папа, а па-другое, таму што гэтым жэстам, Пантыфік даў яшчэ адзін знак суцяшэння для
ўсяго карэйскага народа. Справа ў тым, што вернікам, які папрасіў аб уступленні ў
хрысціянскую супольнасць быў спадар Лі О Джын, бацька аднаго з юнакоў, загінуўшых
падчас крушэння пасажырскага парома “Севол” у красавіку 2014 г. Яшчэ перад прыездам
Пантыфіка ён здзейсніў пешую пілігрымку, прайшоўшы амаль 900 км і нясучы ў руках драўляны
крыж. 15 жніўня 2014 г., перад св. Імшой на стадыёне ў Тэджоне, мужчына падышоў да
Святога Айца і папрасіў аб удзяленні сакрамэнту. Папа з радасцю пагадзіўся.
У
цырымоніі, якая прайшла раніцай 17 жніўня, прынялі ўдзел іншыя дзеці Лі О Джына. Хрост
адбываўся ў простай форме. Праводзіў абрад карэйскі святар, а Пантыфік асабіста дзейсніў
паліванне вадой і намашчэнне святым хрызмам. Лі О Джын пажадаў хрысціцца пад іменем
Францішак.
Падчас крушэння парома “Севол” загінулі амаль 300 чалавек, большасць
з якіх падлеткі. Папа назваў трагедыю “нацыянальнай катастрофай”, а ў якасці сімвала
салідарнасці са сваякамі загінуўшых, падчас свайго візіту ў Паўднёвую Карэю носіць
на сутане маленькую жоўтую ленту.