Зоркі футболу пацвердзілі ўдзел у міжрэлігійным “Матчы за мір”
Вялікая колькасць
легендарных футбалістаў пацвердзіла свой удзел у “Матчы за мір”, які пройдзе на рымскім
алімпійскім стадыёне 1 верасня 2014 г. Сярод жадаючых праз спорт скіраваць свету пасланне
братэрства і супакою Ліянэль Мэсі, Зінедзін Зідан, Андрэа Пірла, Лука Тоні, Месут
Азіл, Лукас Падольскі, Рабэрта Баджо, Філіпа Інзагі, Самуэль Это, Андрый Шаўчэнка,
Ранальдзіньа і многія іншыя. Капітанамі каманд, якія сустрэнуцца на полі, будуць італьянскі
галкіпер Джанлуіджы Буфон і віцэ-прэзідэнт італьянскага клуба “Інтэр” і былы аргентынскі
паўабаронца Хаўер Дзанэці. Выбіралі футбалістаў і рыхтавалі да матчу трэнеры нацыянальнай
збонай Аргентыны Херарда Марціна і англійскага “Арсенала” Арсэн Венгер.
Матч
за мір, арганізаваны па ініцыятыве папы Францішка, з’яўляецца унікальнай міжрэлігійнай
падзеяй. Ніколі ў гісторыі вызнаўцы хрысціянства, іслама, будызма, юдаізма і сінтаізма
не выходзілі разам на футбольнае поле, каб сказаць “не” войнам і канфліктам, і тым
больш, адгукнуўшыся на ініцыятыву Святога Айца.
“Гэта ідэя нарадзілася падчас
адной прыватнай размовы, якую я меў шчасце, правесці з папам Францішкам”, - распавёў
Хаўер Дзанэцці падчас прэс-канферэнцыі на Ватыканскім радыё 25 жніўня 2014 г. “Са
Святым Айцом мы размаўлялі пра многія рэчы. Сярод таго, што найбольш хвялавала была
праблема міру на планеце. І тады нам прыйшла ў голаву ідэя задзейнічаць нашых паплечнікаў
і сяброў, што можа стаць адпраўной кропкай для ўсяго свету. Але самым важным з’яўляецца
не матч, але пасланне міру для ўсяго свету, якое хоча даць наш Папа”, - сказаў былы
аргентыскі футбаліст.
У прэзентацыі “Матчу за мір”, прынялі ўдзел і іншыя футбалісты.
Хуан Ітурбэ з рымскай “Ромы” адзначыў, што “шчаслівы прыняць удзел у “Матчы за мір”,
а капітан “Лацыа” Крысціян Ледэсма лічыць “гонарам для сябе ўдзельнічаць у такім глыбокім
пасланні”.
Перад матчам на рымскім алімпійскім стадыёне выступяць аргентынская
спявачка і актрыса Марціна Штосэль, вядомая пад творчым псеўданімам Віялета, і італьянскі
спявак Нэк.
Папа Францішак сустрэнецца з удзельнікамі матча 1 верасня каля
16.00 у ватыканскай Зале Паўла VI. Сам Пантыфік не пойдзе на стадыён, але будзе назіраць
за спаборніцтвам па тэлевізары. Матч пачнецца ў 20.45 па рымскім часе.