Ватыканскі дыпламат: дзейнасць місіі ААН у Іраку дапаможа прыцягнуць да адказнасці
злачынцаў
Заклікі папы Францішка
ў сувязі з сітуацыяй у Іраку паспрыялі мабілізацыі міжнароднай супольнасці, лічыць
пастаянны назіральнік Апостальскай Сталіцы пры ААН у Жэневе арцыбіскуп Сільвана Тамазі.
Першым канкрэтным крокам з мэтай спынення джыхадзістаў, на яго думку, стала накіраванне
спецыяльнай місіі ААН у Ірак, якая раследуе паведамленні аб варварскіх злачынствах,
у якіх абвінавачваюцца баевікі “Ісламскай дзяржавы Ірака і Леванты”. Рашэнне аб адпраўцы
тэрміновай місіі было прынята Саветам ААН па правах чалавека 1 верасня 2014 г. У спецыяльнай
рэзалюцыі гэтага праваабарончага органа гаворыцца, што дзеянні ісламістаў могуць быць
кваліфікаваны як ваенныя злачынствы і злачынствы супраць чалавецтва. У інтэрв’ю Ватыканскаму
радыё арцыбіскуп Тамазі патлумачыў, што раследванне дапаможа прыцягнуць да суду вінаваных,
а таксама прадэманстраваць непрымальнасць падобных актаў, каб спыніць іншыя радыкальныя
групоўкі.