Касцёл, як клапатлівая маці, дапамагае расці ў веры
Мацярынства Касцёла
было тэмай катэхезы папы Францішка падчас агульнай аўдыенцыі на плошчы св. Пятра 3
верасня 2014 г. Пантыфік нагадаў, што людзі не становяцца хрысціянамі “самі па сабе,
дзякуючы ўласным сілам, аўтаномным чынам”, не становяцца хрысціянамі “лабараторным”
шляхам, але нараджаюцца і ўзрастаюць у веры ўнутры вялікага цела, якім з’яўляецца
Касцёл. У такім сэнсе Касцёл – гэта сапраўдная маці, якая дае жыццё ў Хрысце і дазваляе
жыць разам з іншымі братамі ў адзінстве Святога Духа. “У гэтым сваім мацярынстве,
Касцёл мае за прыклад Панну Марыю – самы прыгожы і высокі прыклад, які толькі можа
існаваць”, - сказаў Папа і падкрэсліў, што нараджэнне Езуса ва ўлонні Марыі з’яўляецца
“сапраўднай прылюдыяй нараджэння кожнага хрысціяніна ва ўлонні Касцёла”. “Усвядомім,
што адносіны, якія яднаюць Марыю і Касцёл такія моцныя, як ніякія іншыя: гледзячы
на Марыю, мы ўсё больш адкрываем цудоўнае і пяшчотнае аблічча Касцёла; гледзячы на
Касцёл – распазнаем узвышаныя рысы Марыі. Мы, хрысціяне – не сіроты! Мы маем маму,
маем маці і гэта цудоўна! Мы не сіроты! Касцёл і Марыя – гэта маці!”, - сказаў Святы
Айцец.
Францішак патлумачыў, што мацярынства Касцёла рэалізуецца ў нараджэнні
дзяцей праз сакрамэнт хросту. “Кожны раз, калі хрысцім дзіця – яно становіцца дзіцём
Касцёла, уваходзіць у Касцёл. І з гэтага часу, ён, як клапатлівая маці, дапамагае
расці ў веры і сілай Святога Духа ўказвае нам шлях збаўлення, баронячы ад зла”, -
адзначыў Папа.
“Такім чынам, мы ўсе пакліканы прыняць з адкрытым сэрцам слова
Божае, якое Касцёл нам штодзённа перадае, таму што яно мае здольнасць змяняць знутры.
Толькі Слова Божае мае гэту здольнасць – перанямяць знутры, ад нашых самых глыбокіх
каранёў (...) А хто нам дае слова Божае? Маці Касцёл! Ён, як малаком насычае Божым
словам сваіх дзяцей, наталяе іх на працягу ўсяго жыцця гэтым Словам, і гэта цудоўна!
(...) Слова Божае, якое атрымліваем ад Касцёла перамяняе нас, робіць нашу чалавечнасць
пульсуючай не паводле цела, а паводле Духа”, - адзначыў Пантыфік.
Папа падкрэсліў,
што Касцёл, як сапраўдная маці, прыкладае ўсе намаганні каб бараніць сваіх дзяцей.
“Гэта абарона заключаецца ў закліку да пільнасці: чуваць, каб не трапіць у
пасткі і спакусы злога. Таму што, нават калі Бог і перамог д’ябла, апошні заўсёды
вяртаецца са сваімі спакусамі; мы ведаем пра гэта, бо ўсе падвяргаемся ім (...). Д’ябал,
“як леў кружыць з рыкам”, кажа св. Пётр. Ад нас жа патрабуецца не быць неразумнымі,
але чуваць і супрацьстаяць, будучы моцнымі ў веры. Супрацьстаяць, дзякуючы парадам
Маці Касцёла, супрацьстаяць з дапамогай Маці Касцёла, які, як добрая мама, заўсёды
суправаджае сваіх дзяцей у цяжкія моманты”, - сказаў Папа.
Францішак нагадаў,
што Касцёл складаюць не толькі святары і біскупы, але ўсе ахрышчаныя людзі. Ён заклікаў
прасіць Панну Марыю, каб навучыла адносіцца да іншых людзей у духу мацярынства – гэта
значыць са здольнасцю прымаць, прабачаць, падтрымліваць, даваць надзею і давер.
Напрыканцы
аўдыенцыі, вітаючы маладыя сужэнскія пары прысутныя на плошчы св. Пятра, Папа адзначыў,
што ажаніцца сёння – гэта мужны акт. Ён заклікаў сужонкаў прыкладаць намаганні, каб
захоўваць жывым свой кантакт з Богам і такім чынам заўсёды захоўваць сваю любоў сапраўднай
і трывалай.