Францішак: Бог прадвызначыў нас быць падобнымі да свайго Сына
У свята Нараджэння
Найсвяцейшай Панны Марыі папа Францішак прапанаваў паразважаць аб стварэнні сусвету
і шляху, які Бог прайшоў з чалавецтвам на працягу гісторыі. Гэтым тэмам Пантыфік прысвяціў
гамілію падчас ранішняй Эўхарыстыі ў Доме св. Марты 8 верасня 2014 г. Чытаючы Кнігу
Быцця, – сказаў Папа – “існуе небяспека падумаць аб Богу, як аб чараўніку”, які дзейнічаў
з дапамогай “чароўнай палачкі”. Але Бог не чараўнік, а Стварыцель: Ён ствараў рэчы,
надзяляючы кожную з іх адпаведным унутраным законам і аўтаноміяй, якія дазваляюць
развівацца і дасягаць паўнаты, адзначыў Францішак. Такім законам для чалавека стала
свабода – яна дапамагае крочыць праз гісторыю, быць адказным за стварэнне, панаваць
над ім, развівацца і імкнуцца да паўнаты часоў. Гэтай паўнатой, паводле задумкі Бога,
стала прыйсце Езуса Хрыста. Папа нагадаў, “што Бог прадвызначыў усіх нас (...) быць
падобнымі да вобраза Сына свайго”. “Такі шлях чалавецтва і чалавека. Бог хацеў, каб
мы былі падобнымі да Яго Сына, а Яго Сын – падобны да нас”, лічыць Пантыфік. Да гэтай
мэты, нягледзячы на грахі і непаслухмянасць людзей, Бог вядзе усіх, на працягу гісторыі.
Яе кульмінацыя, паводле Францішка, наступіла “у адным маленькім мястэчку”, з дапамогай
св. Юзафа і Панны Марыі.
І так мы “прыйшлі да Марыі” – знаходзімся ў “сенях
гэтай гісторыі, якімі з’яўляецца Нараджэнне Маці Божай”, - сказаў Папа, узгадваючы
пра сённяшняе свята. “Сёння мы можам паглядзець на Маці Божую – маленькую, святую,
безгрэшную, чыстую, прадвыбраную стаць Багародзіцай, але таксама можам паглядзець
на доўгую, векавую гісторыю, якая засталася за плячыма і спытаць сябе: “Як я праходжу
сваю? Ці дазваляю Богу крочыць са мной? Дазваляю Яму ісці побач або іду ў адзіноце?
Ці дазваляю Яму суцяшаць мяне, дапамагаць мне, прабачаць, весці на сустрэчу з Езусам
Хрыстом?”. Менавіта сустрэча з Панам, з’яўляецца мэтай нашага шляху, перакананы папа
Францішак.