Магчыма, у ніводнай
навучальнай установе новы навучальны год не пачынаецца так радасна. Трэба прызнацца,
для вучняў, студэнтаў першае верасня – гэта працяглае і маркотнае “зноў у школу…”
Для слухачоў Мінскага теалагічнага каледжу імя св. Яна Хрысціцеля пачатак заняткаў
– нібыта свята: бо ўсе яны вучыцца прыйшлі па жаданні. Каля 60 чалавек, студэнты трох
курсаў, сабраліся на св. Імшу ў мінскім Касцёле св. Сымона і св. Алены, якую ўзначаліў
дапаможны біскуп Мінска-Магілёўскай архідыяцэзіі Юрый Касабуцкі. У гаміліі іерарх
нагадаў евангельскую падзею – размову Езуса Хрыста з вучнямі – і падзяліўся сваімі
думкамі наконт вынікаў, якія слухачы каледжу могуць дасягнуць напрыканцы вучобы. “Па-першае,
гэта пазнанне Бога, бліжэйшая сустрэча з Езусам Хрыстом праз навучанне, праз тое,
што чалавек больш пазнае праўду, пазнае Бога. Чым больш мы пазнаем, тым больш мы любім.
Галоўная мэта – любоў да Бога, як было з апосталамі. Калі мы ўзрастаем у гэтай любові,
мы сведчым і дзелімся гэтай любоўю з іншымі. Гэта любоў напаўняе нас радасцю. Веды
будуць дапаможнымі, але галоўнае – Любоў, якая зробіць за нас усё”, - адзначыў біскуп
Юрый Касабуцкі.
Мінскі тэалагічны каледж – сапраўды ўстанова ўнікальная. Ён
аб’яднаў людзей розных статусаў, прафесій, узростаў. Тут насамрэч бачыш – вучыцца
ніколі не рана і ніколі не позна. Самаму малодшаму студэнту – 17 гадоў, самаму сталаму
– 63. Аляксандра Зуева, студэнтка 2 курса, глядзіць на працэс навучання прафесійна
– яна сама выкладчыца. І бачыць адрозненні – цалкам сямейная атмасфера сярод слухачоў
і роўнае стаўленне да іх выкладчыкаў. Увогуле, яна дастатковае нядаўна прыйша да веры
і тут, у каледжы, хацела б нібыта нагнаць упушчанае. “Вельмі хацела паглыбіць свае
веды і не ўрыўкамі, як можна гэта зрабіць самастойна. А сістэматычна і метадалагічна,
каб пазнаць гэты свет Каталіцкага Касцёла, які мяне прыцягнуў”, - прызналася Аляксандра
Зуева.
А веды – разнастайныя. 3 гады, 2 разы ў месяц і дзесяткі прадметаў –
у галіне тэалогіі, філасофіі, катэхізацыі, біблістыкі, літургіі, гісторыі, касцёльнага
права, дабрачыннасці, сямейнага жыцця, рэлігійных сродкаў масавай камунікацыі – і
гэта не поўны спіс. Так званая адукацыйная аснова для адной з галоўных задач хрысціяніна
– быць сведкам Хрыста, адзначыў ксёндз-доктар Ян Крэміс, дырэктар Мінскага тэалагічнага
каледжа імя св. Яна Хрысціцеля. “На працягу гэтах трох гадоў людзі рыхтуюцца, каб
мець веды і прапаведаваць. Нехта можа будзе працаваць у парафіі і весці ўрокі рэлігіі,
а іншыя вучацца, каб угрантаваць сваю веру, не баяцца адказваць на пытанні, якія задаюць
няверуючыя або нават веруючыя”, - адзначыў ксёндз-доктар Ян Крэміс.
Вядома,
гэта і ёсць галоўная мэта навучальнай установы – а Мінскі тэалагічны каледж імя св.
Яна Хрысціцеля быў заснаваны ў 2013 г. на базе Цэнтра падрыхтоўкі катэхетаў– рыхтаваць
слухачоў менавіта да рэлігійнай дзейнаці. Але ў каледжы, лічыць Ірына Лямбовіч, студэнтка
3-га, апошняга курса, вучаць яшчэ і быць Чалавекам, а гэтага больш нідзе не знойдзеш.
“Трэба быць чалавекам у тым асяроддзі, у якім ты знаходзішся: ці гэта Касцёл, ці гэта
праца, ці гэта сям’я. І каледж дапамагае мне менавіта ў гэтым. Раней у мяне былі нейкія
веды, я была практыкуючай каталічкай, але цяпер, навучаючыся тут, я па-іншаму гэта
перажываю. Я стала больш дасведчаным чалавекам і хачу прымяняць веды там, дзе я знаходжуся”,
- падзялілася Іріна Лямбовіч.
Нягледзячы на добрую атмасферу і лёгкі пачатак
новага навучальнага года, кіраўніцтва каледжу агаварылася – дысцыпліну і паспяховаць
ніхто не адмяняў. Пасля таго, як першакурснікам уручылі іх залікоўкі, студэнты адправіліся
на заняткі – спасцігаць новыя для сябе навукі.