Папа: Езус знаходзіцца побач з людзьмі – Ён не прафесар, які прамаўляе з кафедры
Езус – не прафесар,
які прамаўляе з кафедры. Ён знаходзіцца сярод людзей і дазваляе дакрануцца да сябе,
каб даць аздараўленне. З такімі словамі папа Францішак звярнуўся да ўдзельнікаў ранішняй
Эўхарыстыі ў Доме св. Марты 9 верасня 2014 г. Каментуючы літургічны евангельскі фрагмент,
Пантыфік пахіліўся над трыма аспектамі жыцця Езуса Хрыста. Першы – гэта малітва. Езус
часта маліўся да Айца, просячы аб збаўленні для людзей, нагадаў Папа. “Ён і зараз
знаходзіцца перад Айцом, молячыся за нас. І гэта павінна напаўняць нас адвагай! (...)
Сёння, гэта Яго праца: маліцца за нас, за свой Касцёл. Мы часта забываем пра тое,
што Езус моліцца за нас. Але ў гэтым наша сіла. Мы можам сказаць Айцу: “Ойча, калі
Ты не глядзіш на мяне, то паглядзі на свайго Сына, які моліцца за нас”. З самага пачатку
Езус маліўся за свой народ: маліўся, калі быў на зямлі і працягвае маліцца зараз за
кожнага, за ўвесь Касцёл”, - сказаў Пантыфік.
Пасля малітвы, Езус выбраў дванаццаць
апосталаў, сказаў Папа і падкрэсліў, што менавіта Бог выбірае сябе вучняў, а гэта
таксама павінна напаўняць адвагай. “Гэта ўсё любоў! Яна не глядзіць на тое, ці маеш
ты нязграбнае або прыгожае аблічча, а любіць! І Езус робіць тое самае: любіць і выбірае
з любові. І выбірае ўсіх. У Яго спісе няма важных – у двухкоссі – як гэта прынята
паводле крытэрыяў гэтага свету. Для Яго ўсе раўны. Але ўсе маюць агульную рысу: яны
з’яўляюцца грэшнікамі. Езус выбраў і выбірае грэшнікаў. У гэтым яго абвінавачвалі
настаўнікі Закона, кніжнікі: “Ён спажывае ежу з грэшнікамі, Ён размаўляе з распусніцамі...”.
Езус кліча ўсіх. Узгадаем прыпавесць пра вяселле сына: калі запрошаныя не прыйшлі,
што зрабіў гаспадар дому? Паслаў сваіх слугаў са словамі: “Ідзіце і прывядзіце ў дом
усіх. Добрых і кепскіх!”, кажа Евангелле. Езус выбірае ўсіх!”, - сказаў Папа.
Нарэшце,
апошні аспект, на які звярнуў увагу Пантыфік – гэта непасрэдная блізкасць Хрыста да
людзей. “Ён не быў прафесарам, настаўнікам, містыкам, які аддаляўся ад народа і прамаўляў
з кафедры. Не! Ён знаходзіўся сярод людзей: дазваляў дакранацца да сябе; дазваляў
людзям задаваць пытанні. Такі Езус: блізкі да людзей. Гэта блізкасць не была для Яго
чымсьці новым: Ён падкрэсліваў гэта сваёй манерай дзейнічаць – а гэта было першае,
што Бог прыгатаваў для свайго народа. Бог казаў: “Падумайце, які яшчэ народ мае Бога,
настолькі блізкага, якім з’яўляюся Я для вас?”. Блізкасць Бога да свайго народа –
гэта блізкасць Езуса да людзей”, - сказаў Папа.
На заканчэнне гаміліі, Францішак
заклікаў вернікаў давяраць Езусу, таму што Ён моліцца за свой народ, выбірае яго і
заўсёды прабывае побач з ім.