Стаць шчодрымі сведкамі
любові Бога і радасці Евангелля, каб свет усё хутчэй набліжаўся да адзінства – з такім
заклікам да ўдзельнікаў Генеральнай асамблеі Руху факаляраў звярнуўся папа Францішак
26 верасня 2014 г. У форуме, які праходзіць у Кастель-Гандольфа, прымаюць удзел каля
500 дэлегатаў са 137 краін свету. Францішак прыняў іх на аўдыенцыі ў Ватыкане. Рух
факаляраў – нагадаў Папа, – нарадзіўся з “маленькага семені”, якое “дало жыццё дрэву,
што працягнула свае галіны ва ўсе выразы хрысціянскай сям’і, а таксама да вызнаўцаў
іншых рэлігій і тых, хто ўзрошчвае справядлівасць і салідарнасць, разам з пошукам
ісціны”. Папа Францішак даў факалярам тры парады: сузіраць, выходзіць у свет і займацца
адукацыяй. Сёння, як ніколі раней, на яго думку, існуе патрэба ў сузіранні Бога і
цудаў Ягонай любові. Але сузіранне павінна весці да братэрскай сустрэчы з іншымі,
бо інакш будзе самалюбаваннем.
Другі заклік – выходзіць у свет – азначае шчодрае
сведчанне любові Бога з павагай і крэатыўнасцю, бо без крэатыўнасці “немагчыма ісці
наперад”. Каб ісці ў свет, паводле Папы, трэба стаць экспертамі ў мастацтве, якое
называецца дыялог. Пантыфік у чарговы раз заклікаў ісці да тых людзей, якіх можна
назваць “ранамі грамадства”. Дастаткова “бізантынізму” – Касцёл, гэта “палявы шпіталь”,
задача якога лячыць раны, адзначыў Папа.
Урэшце, трэцяе патрабаванне Святога
Айца тычылася адукацыйнай дзейнасці. Без добрага выхавання новых пакаленняў, сцвердзіў
Папа, немагчыма рэалізаваць сур’ёзны і даўгавечны праект на службе новага чалавецтва.
Цытуючы заснавальніцу руху факаляраў К’яру Любіч, папа Францішак нагадаў аб
неабходнасці ствараць “новых людзей” – “людзей з душой, сэрцам, розумам Езуса, здольных
пазнаць і інтэрпрэтаваць патрэбы, клопаты і надзеі, якія жывуць у сэрцы кожнага чалавека.”