Французскі іерарх пра абмен думкамі паміж кардыналамі перад Сінодам
Абмен думкамі паміж
кардыналамі на тэмы, якія будуць абмяркоўвацца на Сінодзе Біскупаў служыць узбагачэнню
рэфлексіі і фарміраванню поглядаў, лічыць кардынал Андрэ Вэн-Труа, арцыбіскуп Парыжа.
У інтэрв’ю архідыяцэзіяльнаму інтэрнэт-парталу ён падкрэсліў, што Касцёл з’яўляецца
сям’ёй, у якой дэбаты маюць права на існаванне, а не таталітарнай партыяй, дзе навязваецца
адзінае правільнае меркаванне, выключаючы любое мысленне. У Касцёле заўсёды былі розныя
школы, у якіх выпрацоўваліся розныя тэалагічныя гіпотэзы. Некаторыя з іх былі прызнаны,
іншыя з’яўляюцца несумяшчальнымі з дактрынай. Тым не менш, усё можа дапамагчы праліць
святло на пытанні, узнятыя ў ходзе дыскусіі, лічыць французскі іерарх.
Сінод,
удзельнікам якога з’яўляецца арцыбіскуп Парыжа, аб’ядноўвае розныя інтэрпрэтацыі і
традыцыі. Ён павінен імкнуцца да дасягнення кансэнсусу і сфармулаваць “прапановы”,
якія затым будуць прадстаўлены Пантыфіку, нагадаў кардынал Вэн-Труа. Гэта Святы Айцец
выконвае сваю місію выкладання, ухваляючы пэўныя прапановы, каб яны сталі абавязковымі
ва ўсім Касцёле, дадаў арцыбіскуп Парыжа напярэдадні адкрыцця Сінода Біскупаў.