Беларусь: каталіцкая ВНУ – праект нацыянальнага значэння
Вядома, вучыцца ніколі
не позна, тым больш, шукаць шлях да Бога і атрымліваць веды ў галіне тэалогіі. У
Мінску заснавана “Тэалагічная акадэмія імя св. Яна Паўла ІІ”. Рашэнне было прынята
на пасяджэнні Канферэнцыі Каталіцкіх біскупаў Беларусі, а зараз рыхтуюцца дакументы,
якія будуць сктраваны ў адпаведыя дзяржаўныя органы, каб афіцыйна зарэгістраваць новую
навучальную ўстанову краіны. Па сутнасці, гэта ВНУ, якая будзе рыхтаваць спецыялістаў
для Каталіцкага Касцёла ў Беларусі: супрацоўнікаў з вышэйшай адукацыяй розных ступеняў
і навуковых работнікаў вышэйшай кваліфікацыі, паведаміў Ватыканскаму радыё аб планах
арцыбіскуп Тадэвуш Кандрусевіч, Мітрапаліт Мінска-Магілёўскі. “Гэты праект вельмі
важны для Каталіцкага Касцёла ў Беларусі. Сама акадэмія будзе складацца з двух напрамкаў:
семінарыя і непасрэдна так званы Інстытут тэалогіі для свецкіх. Гэта значыць, што
некаторыя дысцыпліны і семінарысты, і свецкія будуць вывучаць разам. Такая практыка
ёсць у шматлікіх краінах свету. Так плануецца. Для рэалізацыі неабходна шмат часу,
шмат цярпення і малітвы”, - адзначыў іерарх.
Арцыбіскуп Кандрусевіч некалькі
разоў аказаўся – гэта толькі планы, як будзе развівацца новы і знакавы для Каталіцкага
Касцёла Беларусі праект, пакуль сказаць цяжка. Але база ўжо ёсць – у краіне паспяхова
дзейнічаюць катэхечныя і тэалагічны каледжы – разам там навучаюцца каля 200 чалавек,
працуюць семінарыі. Магчыма, у будучым нейкія з гэтых устаноў стануць філіяламі Тэалагічнай
акадэміі. Аб з’яўленні такой установы беларускі іерарх марыў, як толькі прыехаў працаваць
у Беларусь з Масквы. Там, дарэчы, гэты шлях яму ўдалося прайсці і нават атрымаць рэгістрацыю
ў Міністэрстве адукацыі Расіі, узгадаў Мітрапаліт. “Тое, што гэта праект нацыянальны,
кажа той факт, што рашэнне прыняла Канферэнцыя Каталіцкіх біскупаў. Тое, што мы хочам
нешта такое мець, я аб гэтым нагадваў даўно, мы абмяркоўвалі з біскупамі, на сустрэчах
са святарамі. Можа нечакана, што так хутка. Але трэба калісьці пачынаць і калі сказаў
“а”, трэба казаць і “б””, - адзначыў іерарх.
Галоўнай мэтай стварэння “Тэалагічнай
акадэміі імя св. Яна Паўла ІІ” арцыбіскуп бачыць знаёмства з хрысціянствам, як кажуць,
з першых вуснаў, пазнанне сацыяльнага вучэння Каталіцкага Касцёла. Усё гэта з цягам
часу дазволіць сфарміраваць у беларускім грамадстве пласт тэалагічна адукаванай інтэлегенцыі,
якая, вядома, за часы атэізма была знішчана, а зараз многія людзі, відавочна, шукаюць
нейкія адказы самастойна і не знаходзяць іх. Таму, так плануецца, акадэмія будзе адкрыта
для слухачоў не толькі каталіцкага, але і іншых веравызнанняў, а таксама для тых,
хто толькі шукае шлях да Бога, паведаміў арцыбіскуп Кандрусевіч. “Чаму Беларусь, якая
мае паўтара мільёны католікаў, не можа мець такой навучальнай установы, якая б давала
магчымасць атрымаць навуковую ступень? Чаму трэба ехаць вучыцца за мяжу? Стварэнне
акадэміі – гэта таксама прэстыж Беларусі, гэта важная справа для краіны і Каталіцкага
Касцёла, гэта справа важная і для хрысціянства ў Беларусі таксама”, - сказаў іерарх.
Тэалагічная акадэмія імя св. Яна Паўла ІІ будзе спачатку праходзіць рэгістрацыю
ў Апараце ўпаўнаважанага па справах рэлігій і нацыянальнасцяў, але наступным крокам,
магчыма, стане і спроба рэгістрацыі ў Міністэстве адукацыі Беларусі. Трэба зрабіць
усё, лічыць Мітрапаліт Кандрусевіч, каб навучальная ўстанова ў будучым была часткай
сістэмы адукацыі, а студэнты атрымлівалі дыпломы дзяржаўнага ўзору.