Святы Айцец пра трынітарную малітву і тры віды сяброўства
У малітве мы можам
прасіць аб многім, але самым вялікім дарам Бога з’яўляецца Святы Дух, нагадаў папа
Францішак 9 кастрычніка 2014 г. падчас ранішняй Эўхарыстыі ў капліцы сваёй ватыканскай
рэзідэнцыі. На прыкладзе евангельскага апавядання пра чалавека, якія апоўначы прыйшоў
да свайго сябра, каб папрасіць хлеба, Францішак патлумачыў, якой павінна быць сапраўдная
малітва і чаму адкрытасць Бога пераўзыходзіць чалавечую. Папа звярнуў увагу на тры
віды сяброўства. У жыцці ёсць па-сапраўднаму “залатыя сябры”, якія могуць падзяліцца
заўсёды і ўсім. Ёсць і такія, якіх мы можам назваць проста добрымі сябрамі. Трэці
ж від, гэта асобы, сяброўская сувязь з якімі прадугледжвае настойлівасць і нават надакучлівасць.
Езус казаў, што не толькі сябры, якія нас суправаджаюць на жыццёвым шляху дзеляцца
тым, аб чым просім, але і Айцец, які ёсць у Небе, заўважыў Пантыфік. “Прасіце, і будзе
дадзена вам; шукайце, і знойдзеце; стукайце, і адчыняць вам. Бо кожны, хто просіць,
атрымлівае; і хто шукае, знаходзіць; і хто стукае, таму адчыняць”, - гэтымі словамі,
на думку Папы, Езус хацеў абудзіць у апосталаў давер да малітвы. Маліцца, гэта нібыта
стукаць у сэрца Бога, адзначыў ён.
У адказ на малітву Бог заўсёды дае больш,
чым мы яго просім: свой падарунак Ён заўсёды дапаўняе, чымсці, што яго робіць асабліва
цудоўным. І гэтым з’яўляецца Святы Дух, сказаў Святы Айцец.
Пантыфік заклікаў
вернікаў да “трынітарнай малітвы”, памятаючы пра ўсе асобы Найсвяцейшай Тройцы. Езус
– наш спадарожнік, Які дае ўсё, аб чым мы просім; Айцец – Які клапоціцца пра нас і
любіць і Святы Дух – дар, Які не дазваляе нам страціць надзею, заключыў ён.