Святы Пасад нагадаў у ААН пра існуючыя міжнародныя праблемы
Святы Пасад у мінулыя
дні выказаў сваё меркаванне і занепакоеннасць адносна некаторых міжнародных праблем.
Гэта адбылося падчас дыскусій і пасяджэнняў у рамках 69-й сесіі Генеральнай Асамблеі
ААН. Арцыбіскуп Бернардзіта Ауса нагадаў, што амаль 3 мільёны дзяцей былі забітыя
і 6 мільёнаў пакалечаныя ў выніку ўзброеных канфліктаў. Падчас дыскусіі на тэму правоў
дзяцей, прадстаўнік Апостальскай Сталіцы адзначыў прагрэс у барацьбе з дзіцячай смяротнасцю,
але заўважыў, што гэтыя намаганні падрываюцца чарговымі канфліктамі. Усцяж у многіх
месцах дзеці становяцца ахвярамі голаду, адсутнасці медыцынскага абслугоўвання, гандлю
людзьмі, сексуальнай эксплуатацыі, вярбоўкі ў армію і прымусовай працы. Іерарх запэўніў
у падтрымцы ініцыятыў на карысць правоў дзяцей з боку Святога Пасаду і выказаў задавальненне
ў сувязі з прысуджэннем Нобелеўскай прэміі міру сёлета тым, хто займаецца абаронай
дзяцей.
Арцыбіскуп Ауса прыняў удзел таксама ў іншай дыскусіі, прысвечанай
абароне спецыфікі і культуры карэнных народаў. Ён нагадаў пра іх права на развіццё
згодна са сваімі традыцыйнымі каштоўнасцяямі і падкрэсліў, што гэта не можа ігнаравацца
ва ўмовах глабалізацыі, індустрыялізацыі і урбанізацыі. Сёння ў свеце пражывае больш
за 370 мільёнаў прадстаўнікоў карэнных народаў у 90 краінах. Ватыканскі дыпламат адзначыў,
што ўсе ініцыятывы, якія іх тычацца, павінны кіравацца павагай да іх самабытнасці
і культуры, у тым ліку рэлігійных перакананняў.
Яшчэ адной тэмай, якую узняў
прадстаўнік Святога Пасаду на форуме ААН, стала прыблема крайняй беднасці і забеспячэння
збалансаванага падыходу да вырашэння экалагічных праблем. Падчас пасяджэння камітэта
па справах устойлівага развіцця і глабальнай абароны, ён выказаў перакананне, што
краіны з высокай ступенню тэхналагічнага развіцця маюць вялікія магчымасці змякчыць
негатыўныя наступствы экалагічнага крызісу, ад якога пакутуюць у асноўным бедныя краіны.
Іерарх лічыць апошняе парадаксальным і несправядлівым. Святы Пасад перакананы, што
змена клімату з’яўляецца не толькі пытаннем абароны навакольнага асяроддзя, але і
праблемай справядлівасці і маральнага імператыву. Арцыбіскуп Ауса адзначыў, што чалавецтва
ўступіла з навакольным асяроддзем у “маральны запавет”, згодна з якім усе краіны і
ўсе людзі павінны супрацоўнічаць паміж сабой, каб зрабіць яго здаровым месцам для
жыцця цяперашняга і будучых пакаленняў.