Іерарх: у Страсбургу Папа будзе казаць аб сацыяльных праблемах
Папа Францішак, прамаўляючы
ў Еўрапейскім Парламенце і Савеце Еўропы, перадусім будзе казаць пра недахопы ў сацыяльнай
сферы на Старым Кантыненце, лічыць арцыбіскуп Марыё Тоза, сакратар Папскай рады “Iustitia
et pax”. У інтэрв’ю італьянскаму інтэрнэт-парталу “Vatican Insider” іерарх нагадаў
пра асаблівую заклапочанасць Пантыфіка сацыяльнымі праблемамі. “Патрабаванне сацыяльнай
справядлівасці блізка звязана з абвяшчэннем Евангелля”, - сказаў ён. На думку арцыбіскупа,
Касцёл не павінен умешвацца ў палітыку, але абавязаны рабіць націск на душпастырства
сацыяльнай сферы жыцця грамадства. Іерарх таксама падкрэсліў важнасць аб’яднання Еўропы
перад абліччам эканамічнага крызісу, бо самастойна вырашыць існуючыя праблемы для
краін – немагчыма. Візіт Святога Айца ў Страсбург, звязаны з наведваннем Еўрапейскага
Парламенту і штаб-кватэры Савета Еўропы, пройдзе 25 лістапада 2014 г.