Касцёл мае патрэбу
ў Святым Духу, сказаў папа Францішак, звяртаючыся да членаў асацыяцыі “Catholic Fraternity”
– міжнароднага аб’яднання харызматычных рухаў, якіх прыняў на аўдыенцыі ў ватыканскай
Зале Паўла VI 31 кастрычніка 2014 г. У сваёй прамове Пантыфік звярнуў асаблівую ўвагу
на важнасць адзінства ў адметнасцях. Аднастайнасць, на яго думку, не адпавядае каталіцтву
і хрысціянству ў цэлым. Таму, неабходна шукаць адзінства ў адметнасцях. Яно, паводле
Святога Айца, заключаецца ў тым, каб з радасцю распазнаваць і прызнаваць існаванне
розных дароў, дадзеных Святым Духам і ставіць іх на службу ўсіх у Касцёле. “Адзінства
– гэта здольнасць слухаць, прымаць адметнасці, мець свабоду думаць па-іншаму і паказваць
гэта! З усёй павагай да іншага, які з’яўляецца маім братам. Не бойцеся адметнасцяў!”,
- заклікаў Пантыфік. Папа запрасіў членаў харызматычнай асацыяцыі сведчыць аб важнасці
адкрыцця ўласнага сэрца на асвячальную дзейнасць Святога Духа. Малітву праслаўлення
і адарацыю, асабліва характэрныя харызматычным рухам, Пантыфік параўнаў з дыханнем,
“без якога хрысціянін не можа жыць”.
На заканчэнне сустрэчы Святы Айцец папрасіў
сваіх гасцей памятаць пра малітву заступніцтва, асабліва ў інтэнцыі хрысціян, якія
перажываюць пераслед. “Кроў Хрыста, якую сёння праліваюць шматлікія хрысціянскія мучанікі
ў розных частках свету, заклікае і падштурхоўвае нас да малітвы. Для тых, хто пераследуе
– мы не падзелены, не з’яўляемся лютэранамі, праваслаўнымі, пратэстантамі, католікамі...
Не! Мы адно! Для тых, хто пераследуе – мы хрысціяне! Іх не цікавіць іншае. Гэта экуменізм
крыві, які сёння перажываецца”, - сказаў папа Францішак.