Ватыканскі кардынал выказаў занепакоенасць у сувязі з аперацыяй “Трытон”
1 лістапада 2014 г.
Еўрапейскі саюз распачне новую марскую аперацыю “Трытон”, якая ў адрозненне ад папярэдняй
“Mare Nostrum”, будзе накіравана, не на выратаванне людзей, а на патруляванне марскіх
межаў і стрымліванне міграцыйных плыняў. Гэта падзея выклікае вялікую занепакоенасць
каталіцкіх і свецкіх арганізацый, якія займаюцца праблемамі міграцыі. У інтэрв’ю Ватыканскаму
радыё старшыня Папскай рады пастырства мігрантаў і падарожнікаў кардынал Антоніа Марыя
Вэльё адзначыў, што адбываецца поўная змена курса. Аперацыя “Mare Nostrum” была распачата
пасля трагедыі ля берагоў Лампедузы, калі ў кастрычніку 2012 г. у моры загінулі 368
мігрантаў. Калі “Mare Nostrum” дапамагала мігрантам у моры, то “Трытон” накіраваны,
у першую чаргу, на кантроль і ахову межаў.
Пурпурат падкрэсліў, што міграцыя
– з’ява няпростая. “Тысячы людзей пакідаюць свае краіны не для таго, каб пацешыцца,
а таму, што ратуюцца ад небяспекі і галечы. Многія з іх бягуць ад войнаў у Сірыі,
Іраку, Эфіёпіі. (…) Яны прыплываюць з паўночнай Афрыкі, куды ідуць праз пустыню. Хто
ведае, колькі з іх гіне на шляху ў Лівію. Потым у Лівіі іх змяшчаюць у такія лагеры,
што нашы хлявы здаюцца больш гігіенічнымі. (…) Замест таго, каб пакідаць іх на пагібель
ў Міжземным моры, мы павінны дапамагчы ім”, – упэўнены кардынал Вэльё. На яго думку,
казаць, што “у нас свае праблемы, хай вяртаюцца дамоў”, не толькі не па-хрысціянску,
але і не па-людску. “Як можна сказаць уцекачу з Ірака: “Вяртайся дахаты”? Гэта значыць
асудзіць яго на смерць,” – лічыць іерарх.