Аргентынская праваабаронца пасля сустрэчы з Папам перагледзела сваю пазіцыю
Старшыня аргентынскай
грамадскай арганізацыі “Бабулі Пласа-дэ-Маё” Эстэла дэ Карлота перагледзела сваю ранейшую
крытыку Францішка адносна яго ролі падчас ваеннай дыктатуры ў Аргентыне. “Калі хтосьці
да гэтага часу дрэнна кажа пра Папу, то ён хлусіць”, - сказала праваабаронца пасля
сустрэчы з Пантыфікам у Ватыкане 5 лістапада 2014 г. Адразу ж пасля абрання кардынала
Берголіа на Пасад св. Пятра аргентынскія левыя СМІ высунулі сур’ёзныя абвінавачванні
ў яго адрас: нібыта ён, з’яўляючыся правінцыялам езуітаў, не змагаўся за вызваленне
святароў, схопленых ваенным рэжымам, што пазней абверглі самі ахвяры дыктатуры. Важныя
аргентынскія праваабаронцы першапачаткова падтрымалі абвінавачванні супраць Берголіа.
Папа
Францішак сустрэўся ў мінулую сераду ў Ватыкане з Эстэлай дэ Карлота і яе ідэнтыфікаваным
нядаўна ўнукам Ігнасіа Мантоя Карлота. 36-гадовы малады чалавек з’яўляецца адным з
прыкладна 500 дзяцей праціўнікаў рэжыму, якія нарадзіліся ў турмах і лагерах катаванняў
падчас ваеннай дыктатуры ў Аргентыне (1976-1983), а затым былі адабраныя ў сваіх бацькоў
і перададзеныя ў прыёмныя сем’і. Пантыфік сам выказаў жаданне “пазнаёміцца з унукам,
абняць і прывітаць яго”, прызналася Эстэла дэ Карлота ў размове з аргентынскімі СМІ.
Каталіцкі Касцёл у Аргентыне нядаўна заявіў аб жаданні заняць актыўную пазіцыю
ў дзейнасці па выяўленні выпадкаў незаконных усынаўленняў у перыяд ваеннай дыктатуры,
і адкрыў для праваабаронцаў свае архівы.