Францішак: святочныя яслі і ёлка нясуць пасланне святла, надзеі і любові
19 снежня 2014 г.
папа Францішак прыняў на аўдыенцыі дэлегацыі італьянскіх гарадоў Верона і Катандзара,
якія сёлета сталі ахвярадаўцамі святочных ясляў і ёлкі для плошчы св. Пятра. Святы
Айцец падзякаваў за дары і падкрэсліў, што яны з’яўляюцца выразам традыцый і духоўнасці
рэгіёнаў, з якіх прыбылі. “Каштоўнасці хрысціянства па-сапраднаму зрабілі плённай
культуру, літаратуру, музыку і мастацтва вашых земляў. Яшчэ і сёння яны складаюць
каштоўную спадчыну, якую неабходна захаваць і перадаць будучым пакаленням”, - сказаў
ён. Яслі і святочная ёлка – гэта сімвалы, асабліва дарагія хрысціянскім сем’ям. “Яны
нагадваюць пра таямніцу Уцелаўлення, пра першароднага Сына Божага, які стаў чалавекам,
каб нас збавіць, і святло, якое Ён прынёс у свет са сваім нараджэннем”, - сказаў Папа
і дадаў, што гэтыя сімвалы “узрушваюць сэрцы тых, хто не верыць, таму што кажуць аб
братэрстве, блізкасці і сяброўстве, заклікаючы людзей нашага часу адкрыць прыгажосць
прастаты, узаемнага дзялення і салідарнасці”. “Яны з’яўляюцца заклікам да адзінства,
згоды і міру, заклікам даць месца – у нашым асабістым і грамадскім жыцці – Богу, Які
не прыгодзіць з высакамернасцю, каб навязаць сваю ўладу, але дорыць сваю ўсемагутную
любоў праз безабаронную постаць Дзіця. Яслі і святочнае дрэва, такім чынам, нясуць
пасланне святла, надзеі і любові”, - сказаў папа Францішак.
У склад дэлегацый
з Вероны і Катандзары, з якімі сустрэўся Пантыфік, уваходзілі прадстаўнікі мясцовых
рэлігійных і свецкіх уладаў, а таксама члены асацыяцый і фондаў, якія дапамаглі рэалізаваць
святочны праект.