Беларускія вернікі на сустрэчы Тэзэ: адчуць сябе часткай хрысціянскай сям’і
Цягнікамі, самалётамі,
на аўтамабілях – розным транспартам з розных куткоў Еўропы ў гэтыя дні маладыя вернікі
сцягваюцца ў сталіцу Чэхіі. Прага ў гэтым годзе прымае чарговую, ужо 38-ую па ліку,
экуменічную сустрэчу моладзі ў духу супольнасці з Тэзэ. 27 снежня 2014 г., на форум
выехалі некалькі соцень чалавек і з Беларусі, каб дакрануцца да супольнай радасці
святкавання Божага Нараджэння і сустрэчы Новага 2015 года. У кожнага з пілігрымаў,
вядома, свае прычыны такога падарожжа, свае мэты, але і адзіная на ўсіх інтэнцыя,
адзначыў айцец Сяргей Трысцень, арганізатар пілігрымкі з Мінска-Магілёўскай архідыяцэзіі.
“Для кожнага з нас гэта вялікая падзея. У першую чаргу, гэта пілігрымка як малітва.
Але таксама пілігрымка спакою, асабліва ў гэты час, калі свет перапоўнены неспакоем,
ёсць войны. Мы прагнем прасіць аб супакоі ва ўсім свеце – гэта першая і галоўная інтэнцыя
наша ў гэтым падарожжы”, - сказаў кармеліт.
Сустрэчу арганізуе экуменічная
супольнасць Тэзэ. Гэты рух у 1940 г. заснаваў брат Ражэ, а напрыканцы 1970-х ён жа
стаў ініцыятарам “Пілігрымкі даверу на зямлі” – так называюцца праходзячыя з тых часоў
Еўрапейскія сустрэчы моладзі. Штогод на іх збіраецца да 50 тыс. чалавек – гэта пілігрымы
розных веравызнанняў: католікі, праваслаўныя, пратэстанты, якія жадаюць некалькі дзён
правесці на супольнай малітве, паразважаць над прапанаванымі тэмамі або проста правесці
час з аднадумцамі і аднагодкамі, у тым ліку з самімі братамі з Тэзэ, заўважыў айцец
Сяргей Трысцень. “Для моладзі сустрэча – гэта магчымасць пазнаёміцца і мець зносіны
не толькі паміж сабой у малітоўным асяроддзі, але і з моладзю з іншых краін у паўсядзённым
жыцці”, - сказаў ён.
Жыццё гэта будзе насычаным, толькі лічбы аб гэтым кажуць:
у гэтым годзе на экуменічным форуме будзе прадстаўлена 65 краін, 17 храмаў у гістарычным
цэнтры Прагі адчыняць свае дзверы для ўдзельнікаў, каб правесці набажэнствы 30 і 31
снежня, для вячэрніх малітваў збудуюць палатку на 4,5 тыс. чалавек. У цэлым сустрэчы
Тэзэ, хоць і маюць сваю праграму, з года ў год усё ж адна на другую не падобныя, лічыць
айцец Сяргей Трысцень. “Сустрэча ў Празе, думаю, па фармаце не будзе адрознівацца
ад іншых сустрэч, сістэма ўжо выпрацавана за доўгія гады, той план, які мы маем, яго
будзем прытрымлівацца. Адзінае, што мы ведаем, што Чэхія – секулярная краіна, і нас
арганізатары ўжо папярэдзілі, што не так многа сем’яў прымуць у свае дамы ўдзельнікаў,
а таму будзе больш агульных месцаў для прыпынку і начлега. Таму мы бярэм з сабой спальнікі.
Моладзь ведае, куды едзе і не шукае камфорту, ведае, што гэта пілігрымка, а кожная
пілігрымка – гэта таксама пакута і нейкае вырачэнне”, - заўважыў святар.
Нягледзячы
на гэта, атмасфера, упэўнены айцец Сяргей, незабыўная – добры настрой і духоўны пад’ём
удзельнікі прывязуць дадому, у свае парафіі, да сваіх блізкіх. “Атмасфера Тэзэ – гэта
атмасфера малітвы, любові, сяброўства і адзінай сям’і, якая называецца хрысцінства”,
- адзначыў ён.
А захаваць гэта пачуццё напрацягу года дапаможа ўспамін пра
калядна-навагодні пах. Яшчэ адна лічба – 100 тыс. мандарынаў разам з іншымі прадуктамі
даставяць у Прагу для ўдзельнікаў форума.