Папа перад “Анёл Панскі”: заўважаць бачны знак зоркі нябачнага Бога (поўны тэкст)
Пантыфік павіншаваў
6 студзеня 2015 г. католікаў і праваслаўных, якія адзначаюць Нараджэнне Хрыстова па
юліянскім календары. Ён узначаліў на плошчы св. Пятра малітву “Анёл Панскі” ва ўрачыстасць
Аб’яўлення Пана і спаслаўся на прыклад трох мудрацоў з усходу. Паводле Францішка,
кожны хрысціянін павінен углядацца ў неба, каб шукаць бачныя знакі нябачнага Бога.
“У ноч Божага Нараджэння мы разважалі прыход у Бэтлеемскую пячору пастухоў, якія належалі
да народа Ізраіля. - нагадаў Папа - Сёння, ва ўрачыстасць Аб’яўлення Пана, мы ўзгадваем
прыход мудрацоў, якія прыбылі з усходу, каб пакланіцца нованароджанаму Валадару габрэяў
і ўсеагульнаму Збаўцы і прапанаваць свае сімвалічныя падарункі. Сваім жэстам любові
мудрацы засведчылі, што Езус прыйшоў на зямлю, каб збавіць не адзін народ, але і ўсіх
людзей. Такім чынам, сённяшняя ўрачыстасць пашырае наш позірк да гарызонту ўсяго свету,
каб святкаваць “маніфестацыю” Пана адносна ўсіх людзей, што з’яўляецца праявай любові
і ўсеагульнага збаўлення ад Бога. Ён не прызначае сваёй любові толькі для некаторых
прывілеяваных, але прапануе яе ўсім. Як для ўсіх Ён – Творца і Айцец, так для кожнага
жадае быць Збаўцам. Таму мы пакліканы пастаянна захоўваць вялікі давер і надзею адносна
кожнага чалавека і яго збаўлення: нават тых, хто, здаецца, далёка ад Пана ідзе – або,
хутчэй, аддаляецца – ад Яго гарачай і адданай любові, любові пакорнай. Паколькі Божая
любоў – заўсёды пакорная, вельмі пакорная.
Евангельскае апавяданне аб мудрацах
з Усходу апісвае іх падарожжа як вандроўку душы, як шлях да яднання з Хрыстом. Яны
ўважлівыя да знакаў, якія паказваюць на Яго прысутнасць, нястомныя ў вырашэнні цяжкасцяў
на шляху пошукаў, мужныя адносна наступстваў сустрэчы з Панам для жыцця. Жыццё – яно
такое: хрысціянскае жыццё – гэта вандроўка, уважлівая, нястомная і мужная. Такім чынам
павінен жыць хрысціянін – ідучы уважліва, нястомна і мужна. Досвед мудрацоў нагадвае
падарожжа кожнага чалавека да Хрыста. Як і для мудрацоў, для нас шукаць Бога – значыць
ісці – уважліва, нястомна і мужна – углядаючыся ў неба і заўважаючы бачны знак зоркі
нябачнага Бога, Які гаворыць з нашым сэрцам. Зорка, якая ў стане накіраваць любога
чалавека да Езуса – гэта Божае Слова. Біблія, Евангелле, Божае слова – гэта святло,
якое накіроўвае наш шлях, сілкуе і абнаўляе нашу веру. Гэта Слова Бога абнаўляе нашы
сэрцы і нашы супольнасці. Таму не забывайцеся чытаць і разважаць яго кожны дзень,
каб яно станавілася полымем, якое носім унутры сябе, каб асвятліць нашы крокі, і крокі
тых, хто ходзіць побач з намі, магчыма, спрабуючы знайсці свой шлях да Хрыста. Заўсёды
з Божам Словам! Слова Божае трэба трымаць у руцэ: маленькае Евангелле ў кішэні, у
сумцы, заўсёды, каб прачытаць яго. Не забывайцеся аб гэтым: Божае Слова заўсёды са
мной!
У гэты дзень Аб’яўлення Пана нашы думкі таксама скіраваны да братоў і
сясцёр хрысціянскага Усходу, католікаў і праваслаўных, многія з якіх святкуюць заўтра
Хрыстовае Нараджэнне. Ім я выказваю нашы самыя цёплыя пажаданні.
Хацеў бы нагадаць,
што сёння мы адзначаем Сусветны дзень дзяцей-місіянераў. Гэта свята дзяцей, якія жывуць
з радасцю дарам веры і моляцца, каб святло Езуса дасягнула ўсіх дзяцей свету. Я заклікаю
педагогаў выхоўваць у падлетках місійны дух. Выхоўваць дзяцей не закрытых, але наадварот,
якія бачаць шырокія гарызонты, з сэрцам, якое імкнецца да гарызонту, каб сярод іх
нараджаліся сведкі пяшчоты Бога і прапаведнікі Яго любові.
Звернемся зараз
да Панны Марыі і будзем заклікаць яе абарону для Паўсюднага Касцёла, каб распаўсюджваў
па ўсім свеце Евангелле Хрыста, Lumen Gentium, святло усіх народаў. Каб яна прымушала
нас ісці усё далей і далей па шляху, будучы уважлівымі, нястомнымі і мужнымі”, - сказаў
Папа.
Пасля малітвы “Анёл Панскі” Францішак прывітаў тысячы пілігрымаў, сабраных
на плошчы св. Пятра