2015-02-25 14:16:00

У Ватыкане пахавалі рымскага бяздомнага


На старажытных Тэўтонскіх могілках у Ватыкане быў пахаваны першы ў іх гісторыі бяздомны. 80-гадовы бельгіец Вілі Хэртэлер жыў ахвяраваннямі вернікаў, якія збіраў каля плошчы св. Пятра. Ён часта ўдзельнічаў у Эўхарыстыі і праводзіў дні назіраючы за шматлікімі турыстамі і пілігрымамі. Многія супрацоўнікі ватыканскіх устаноў яго ведалі асабіста. Напачатку студзеня 2015 г. яны заўважылі, што бядняк знік. Пасля нядоўгіх пошукаў стала вядома, што Вілі Хэртэлер памёр. Гэта здарылася ў адной з рымскіх бальніц, куды ён быў дастаўлены пасля таго, як раптоўна згубіў прытомнасць.

Пошукамі бяздомнага займаўся канонік базылікі св. Пятра кс. Амерыка Чані, які часта яму дапамагаў. Калі стала вядома сумная навіна, ён звярнуўся да Пантыфіка з просьбай пахаваць Вілі Хэртэлера на Тэўтонскіх могілках у Ватыкане, дзе спачываюць шматлікія выхадцы з Германіі: рыцары, святары, законнікі і свецкія вернікі. Папа гэту просьбу задаволіў.

Пахаванне адбылося яшчэ ў пачатку студзеня, але інфармацыя Залай Друку Святога Пасаду была распаўсюджана 25 лютага 2015 г.








All the contents on this site are copyrighted ©.