Касцёл успамінае місіянераў-мучанікаў

24 cакавіка ў Каталіцкім Касцёле адзначаецца Дзень малітвы і посту ў памяць аб місіянерах-мучаніках. Гэта тэма не тычыцца толькі першых стагоддзяў хрысціянства, але застаецца актуальнай да нашага часу. Агульная колькасць загінуўшых за Евангелле ў перыяд паміж 1980-2014 гг. складае 1062 асобы.

Паводле агенцтва “Fides”, у перыяд паміж 1980-1989 гг. у свеце загінулі 115 місіянераў. У наступнае дзесяцігоддзе, з 1990 па 2000 г., гэта лічба павялічылася да 604, галоўным чынам, як наступства генацыду ў Руандзе, падчас якога былі забіты 248 святароў, законнікаў, законніц і свецкіх касцёльных супрацоўнікаў. У перыяд паміж 2001-2014 гг. загінулі 343 місіянеры. За мінулы год, аддалі жыццё за Евангелле 17 святароў, 1 законнік, 6 законніц, 1 семінарыст і 1 свецкі вернік – 26 чалавек.

Дзень малітвы і посту ў памяць аб місіянерах-мучаніках быў устаноўлены па ініцыятыве італьянскага Моладзевага руху Папскіх місійных ініцыятыў. Дата – 24 сакавіка – была выбрана невыпадкова: менавіта ў гэты дзень, у 1980 г., быў забіты ў часе цэлебрацыі св. Імшы, арцыбіскуп Сан-Сальвадора Оскар Арнульфа Рамэра-і-Гальдамес, беатыфікацыя якога адбудзецца 23 мая 2015 г. Ініцыятыва мае на мэце абуджэнне памяці пра людзей, якія пралілі сваю кроў даючы сведчанне аб Евангеллі.